اسلام آباد : ترجمان وزیراعظم آفس افتخار درانی نے کہا ہے کہ ساہیوال کے افسوسناک واقعہ کے بعد وزیراعظم عمران خان کے وزیر اعلیٰ پنجاب سے مسلسل رابطے جاری تھے، جےآئی ٹی بنادی ہے، بچوں کی دیکھ بھال حکومت کرے گی۔
یہ بات انہوں نے دفتر سے جاری ایک بیان میں کہی، ترجمان وزیراعظم ہاؤس کا کہنا ہے کہ وزیراعظم نے فی الفور تحقیقات کراکےحقائق سامنے لانے کی ہدایت کی ہے۔
ساہیوال واقعہ انتہائی افسوسناک ہے، وزیراعظم اور وزیراعلیٰ پنجاب سے تواتر سے رابطے میں ہیں، بچوں والا معاملہ انتہائی دردناک ہے، لوگ حقائق جاننا چاہتے ہیں، پنجاب حکومت نے جے آئی ٹی بنائی ہے، جلد نتیجہ سامنے آئے گا، واقعہ کے ذمہ داران کو کیفر کردار تک پہنچائیں گے۔
ترجمان وزیراعظم آفس کے مطابق کے پی پولیس کی طرح پنجاب میں بھی اسکریننگ کا عمل جاری ہے، جو لوگ بہتر پرفارم نہیں کررہے ان کی نشاندہی کی جارہی ہے، پنجاب میں ریفارمز بھی آجائیں گی ،پولیس بہتری کی جانب گامزن ہوجائے گی۔
وزیراعظم اس واقعہ پر بہت زیادہ افسردہ بھی ہیں اور فکرمند ہیں،بچوں کا کوئی قصور نہیں تھا، بچوں کو سپورٹ کیا جائے گا، وزیراعظم ایک رحم دل انسان ہیں، بچوں کی دیکھ بھال حکومت کرے گی۔
