نیویارک: امریکا میں مسلمانوں کی آبادی پر حملے کی منصوبہ بندی پولیس نے ناکام بنا دی، کارروائی میں 3 ملزمان گرفتار کرلیے۔
تفصیلات کے مطابق پولیس کے ہاتھوں گرفتار تینوں ملزمان امریکی شہر نیویارک میں مسلمانوں کی آبادی پر حملہ کرنا چاہتے تھے، تاہم پولیس نے بروقت کارروائی کرتے ہوئے منصوبہ ناکام بنا دیا۔
غیر ملکی خبر رساں ادارے کا کہنا ہے کہ ملزمان نیویارک مسلمانوں کی آبادی ’اسلام برگ‘ پرحملہ کرنے کی تیاری کر رہے تھے، اسلام برگ کی بنیاد1980 میں صوفی بزرگ مبارک علی گیلانی نے رکھی تھی۔
پولیس کے مطابق گرفتار ملزمان اسلام برگ کو بم حملوں سے اڑانا چاہتے تھے، ملزمان سے گھر میں تیار کیے گئے، بم، بارود اور اسلحہ برآمد کرلیا گیا۔
ملزمان نے چھوٹے سلنڈرز کے ساتھ ریموٹ بم تیار کیے تھے، اسلام برگ کا علاقہ 11میل کے رقبے پر پھیلا ہوا ہے، پولیس نے ملزمان سے تفتیش شروع کردی۔
مسلمانوں کی تنظیم مسلم آف امریکا کا ہیڈکوارٹرز بھی اسلام برگ میں موجود ہے۔
امریکا میں نسل پرست لڑکی کا مسلمان طالبہ پر تشدد
مقامی پولیس کی جانب سے آج باقاعدہ پریس کانفرنس کی جائے گی جس میں واقعے سے متعلق مکمل تفصیلات سے آگاہ کیا جائے گا۔
گرفتار ملزمان کی عمریں 18 سے 20 کے درمیان ہیں، جبکہ ایک 16 سالہ طالب علم بھی شامل ہے۔
انتظامیہ نے موقف اختیار کیا ہے کہ اقلیتوں پر حملے کو کسی صورت برداشت نہیں کیا جائے گا، الزام ثابت ہونے پر ملزمان کو قرار واقعی سزا دی جائے گی۔
