اسلام آباد : برٹش ہائی کمشنر نے سیکرٹری ایوی ایشن کو خط میں کہا ہے کہ رواں سال جون سے برٹش ایئر ویز اسلام آباد سے اپنا فضائی آپریشن شروع کرے گی۔
تفصیلات کے مطابق برٹش ہائی کمشنرنے سیکرٹری ایوی ایشن کو خط لکھا ، جس میں کہا گیا ہے کہ پاکستان ایک محفوظ اور پُرامن ملک ہے، پاکستان نے دہشت گردی کے خاتمے کے لئے بھرپور اقدامات کیے، پاکستان میں برٹش ائرویز کا آپریشن دس سال سے بند تھا۔
خط میں مزید لکھا گیا ہے کہ رواں ماہ برٹش ائیر ویز کا تین رکنی وفد انتیس اور تیس جنوری کو اسلام آباد ائیرپورٹ پہنچے گا، وفد میں برٹش ائر ویز کے دنیا بھر کے ایئرپورٹس کے ہیڈ پال کونٹری، ایڈوائزر برٹش ائر ویز ڈیوڈ کریگ اور ڈائریکٹر سیفٹی جوہن مانکس شامل ہیں۔
برٹش ہائی کمشنر نے خط میں مزید بتایا کہ رواں سال جون سے برٹش ایئرویز اسلام آباد سے اپنا فضائی آپریشن شروع کرے گی۔
چند روز قبل برٹش ایئرویز نے پاکستان سے فضائی آپریشن سے پہلے سیکیورٹی چیک کی شرائط رکھ دی تھیں جبکہ برطانوی ہائی کمیشن نے سیکٹری ایوی ایشن ڈویژن اور سول ایوی ایشن اتھارٹی کے ڈائریکٹر جنرل کو تین رکنی وفد کی آمد اور بریفنگ سے متعلق خط لکھا تھا۔
مزید پڑھیں : برٹش ایئر ویز نے پاکستان میں فضائی آپریشن شروع کرنے سے پہلے شرائط رکھ دیں
برطانوی وفد کے پاکستان آنے کا مقصد فضائی آپریشن کے ساتھ سیفٹی اور سیکیوریٹی اقدامات پر مکمل تسلی کرنا ہے۔
یاد رہے دسمبر میں برٹش ایئر ویز نے 10 سال بعد پاکستان سے پروازیں بحال کرنے کا اعلان کرتے ہوئے کہا تھا کہ آئندہ سال جون سے فلائٹ آپریشن شروع کیا جائے گا، برٹش ایئر ویز ہفتے میں 3 فلائٹ آپریٹ کرے گی۔
خیال رہے برٹش ایئر ویز نے 10 سال قبل 2008 میں پاکستان میں اپنا فلائٹ آپریشن معطل کردیا تھا۔
