کراچی: محکمہ موسمیات نے شہرقائد میں آج ہلکی بارش کی پیش گوئی کی ہے، جس کے باعث سردی کی شدت میں ایک بار پھر اضافہ ہوگا۔
تفصیلات کے مطابق محکمہ موسمیات کا کہنا ہے کہ کراچی میں آج رات ہلکی بارش ہوگی، جو جمعرات کی صبح تک جاری رہے گی۔
ڈائریکٹر میٹرولوجسٹ سردار سرفراز کا کہنا ہے کہ آج رات ہونے والی بارش جمعرات کی صبح تک جاری رہے گی، اور کم ازکم درجہ حرارت 9سے10 ڈگری سینٹی گریڈ رہے گا۔
محکمہ موسمیات کے مطابق بارش برسانے والا نیا سسٹم آج سے پاکستان میں داخل ہوگا، کراچی میں آئندہ 24 گھنٹے میں ہلکی بارش کا امکان ہے، جس سے سردی کی شدت میں اضافہ متوقع ہے۔
محکمہ موسمیات نے ملک بھر میں آج سے موسلا دھار بارشوں کی پیش گوئی کی ہے، جبکہ ملک کے بیشتر شہروں میں موسم سرد اور خشک ہے۔
خیال رہے کہ رواں ہفتے کے وسط میں ملک میں بارش اور پہاڑوں پر برفباری کی پیش گوئی ہے، آج سے مغربی ہواؤں کا سلسلہ مختلف علاقوں میں پھیل جائے گا اور یہ سلسلہ جمعرات تک بالائی علاقوں میں برقرار رہے گا، جبکہ مغربی ہواؤں کے زیر اثر بارشیں اور بعض مقامات پر برفباری متوقع ہے۔
