برسلز: پاک بھارت کشیدگی سے متعلق چیئرمین کشیر کونسل ای یو علی رضا سید نے یورپی حکام کو خطوط لکھ دیے۔
تفصیلات کے مطابق چیئرمین کشمیر کونسل ای یو علی رضا سید کی جانب سے لکھے گئے خطوط میں حالیہ پاک بھارت تنازعے کے خاتمے پر زور دیا گیا ہے۔
خطوط یورپی کونسل، کمیشن، پارلیمنٹ اور یورپی سفیروں کو لکھے گئے، خطوط میں کہا گیا ہے کہ کشیدگی کے خاتمے کے لیے اقدامات نہ کئے تو صورت حال بےقابو ہوسکتی ہے۔
علاوہ ازیں چیئرمین کشمیرکونسل ای یو نے یورپی حکام اور اراکین پارلیمنٹ سے ملاقاتیں بھی کیں، اس موقع پر علی رضا سید کا کہنا تھا کہ یورپی یونین پاک بھارت ممکنہ جنگ رکوانے کے لیے اپنا کردار ادا کرے۔
انہوں نے کہا کہ مسئلہ کشمیر خطے میں کشیدگی کی اصل وجہ ہے، مقبوضہ وادی میں کشمیریوں کے 70سال سے حقوق پامال ہورہے ہیں۔
ان کا مزید کہنا تھا کہ یورپی یونین مسئلہ کشمیر کے حل کے لیے فریقین کو مذاکرات پر آمادہ کرے۔
خیال رہے وزیر اعظم عمران خان نے امن کی خاطر بھارتی پائلٹ کو کل رہا کرنے کا اعلان کردیا ہے۔
پاکستان کا جذبہ خیرسگالی، اقوام متحدہ کا بھارتی پائلٹ کی رہائی کے فیصلے کا خیرمقدم
وزیراعظم عمران خان نے پارلیمنٹ کے مشترکہ اجلاس سے خطاب کرتے ہوئے کہا کہ بھارت اس سےزیادہ کشیدگی کوآگے نہ بڑھائے اور کشیدگی کم کرنے اور امن کو ہماری کمزوری نہ سمجھا جائے۔
ان کا کہنا تھا کہ تمام سیاسی جماعتوں نے نیشنل ایکشن پلان پر دستخط کیے ہوئے ہیں، یہ نہیں کہتا پلواما واقعہ بھارت نے کرایا، یہ بتائیں ہمیں اس سے کیا فائدہ؟ بدقسمتی سے بھارت نے ثبوت دینے کے بجائے جنگی جنون بڑھایا۔
