پشاور: خیبر پختون خوا اسمبلی نے پلاسٹک شاپنگ بیگز اور پانی کی پلاسٹک بوتل پر پابندی سے متعلق پارلیمانی کمیٹی تشکیل دے دی۔
تفصیلات کے مطابق کے پی اسمبلی نے پلاسٹک کی تھیلیوں اور پلاسٹک کی بوتلوں پر پابندی کے سلسلے میں اہم قدم اٹھا لیا، اسمبلی نے اس سلسلے میں ایک پارلیمانی کمیٹی بنا دی۔
وزیر بلدیات شہرام ترکئی پارلیمانی کمیٹی کی سربراہی کریں گے، کمیٹی میں عوامی نیشنل پارٹی، پاکستان پیپلز پارٹی، متحدہ مجلس عمل، مسلم لیگ ن اور پی ٹی آئی کے ممبران شامل ہیں۔
اسپیکر مشتاق غنی نے کمیٹی کو ایک ماہ میں رپورٹ پیش کرنے کی ہدایت کر دی ہے، کمیٹی کا قیام ایم ایم اے کے رکن عنایت اللہ کے توجہ دلاﺅ نوٹس پر عمل میں لایا گیا ہے۔
وزیر قانون سلطان محمد نے ایوان کو بتایا کہ پہلے بھی شاپنگ بیگز پر پابندی کے لیے تین ماہ کا وقت دیا گیا تھا۔
یہ بھی پڑھیں: خیبرپختون خوا میں پلاسٹک شاپنگ بیگ پر پابندی عائد
اسمبلی اجلاس میں فیصلہ کیا گیا کہ پارلیمانی کمیٹی کے اجلاس میں سب سے پہلے شاپنگ بیگز پر پابندی سے متعلق ایشو زیر غور لایا جائے گا۔
یاد رہے کہ 15 مارچ کو وزیر اطلاعات خیبر پختون خوا شوکت یوسف زئی نے صوبہ بھر میں پلاسٹک شاپنگ بیگ کی فروخت اور استعمال پر پابندی عائد کر دی تھی۔
اس سلسلے میں تمام ڈی سیز کو دفعہ 144 لگانے کی ہدایت کردی گئی تھی، شوکت یوسف زئی کا کہنا تھا کہ قانون بن چکا ہے، اب عمل درآمد ہوگا، پابندی کا مقصد شہر کو صاف رکھنا ہے۔
