واشنگٹن: ناسا کے پلینٹ ہنٹر خلائی جہاز نے زمین سے 53 نوری سال کی دوری پر زمین ہی جتنا سیارہ ڈھونڈ لیا ہے۔
ایک سائنسی جریدے میں شایع شدہ تحقیق کے مطابق نیا دریافت شدہ سیارہ اپنے ستارے کے گرد 8 دن میں چکر پورا کرتا ہے، یہ سیارہ جس خلائی جہاز نے ڈھونڈ نکالا ہے اسے گزشتہ برس ہی لانچ کیا گیا تھا۔
محققین نے کہا ہے کہ اس سیارے کا جو ستارہ ہے وہ ہمارے سورج سے 20 فی صد چھوٹا ہے۔
ایک سائنس دان کا کہنا تھا کہ وہ ستارے جو ہمارے بے حد قریب ہیں اور زیادہ روشن ہیں، امید ہے کہ ان کے درجنوں زمین جتنے سیارے دریافت ہو جائیں گے۔
یہ بھی پڑھیں: ناسا نے سورج کی نزدیک ترین تصویر جاری کردی
ان کا کہنا تھا کہ کہ موجودہ دریافت پلینٹ ہنٹر TESS کے لیے سنگ میل کی حیثیت رکھتی ہے اور یہ اس کی پہلی دریافت ہے، تاہم اپنی دو سالہ تحقیقی مدت کے دوران یہ دو لاکھ سے زائد ستاروں کی روشنی کو مانیٹر کرے گا۔
واضح رہے کہ پچھلے برس امریکی خلائی تحقیقی ادارہ ناسا نے خلا میں نیا سیٹلائٹ بھیجا تھا جس کا مقصد نظام شمسی کے باہر ایسے سیاروں کی تلاش ہے جو قریب ترین اور روشن ترین ستاروں کے گرد گھوم رہے ہیں۔
