کراچی : کمشنر کراچی افتخار شالوانی کی ہدایت پر کراچی میں ماہ رمضان میں سرکاری نرخوں پر کھانے پینے کی اشیا کی قیمتوں کو کنٹرول کو یقینی بنانے کے لئے تمام ڈپٹی کمشنرز نے اپنے اپنے ضلع میں پرائس کنٹرول مہم شروع کر دی ہے ۔
تمام ڈپٹی کمشنرز نے اپنے ضلع میں پرائس کنڑول مہم کی کامیابی کے لئے اسسٹنٹ کمشنرز اور مختار کاروں پر مشتمل کمیٹیاں قائم کر دی ہیں خو د ڈپٹی کمشنرز پرائس کنڑول کمیٹیوں کی نگرانی کر رہے ہیں۔
کمشنر کراچی افتخار شالوانی نے ڈپٹی کمشنرز سے کہا ہے کہ وہ ہر روز اپنی کارکردگی کا جائزہ لیں اور روزانہ کی بنیاد پر انھیں جرمانوں اور گرفتاریوں کی رپورٹ پیش کریں۔
پہلے رمضان کو ضلعی انتظامیہ کی پرائس کنٹرول کمیٹیوں نے ناجائز منافع خوروں کے خلاف سخت کارروائی کی۔ قبل ازیں کمشنر کراچی کی ہدایت پر ایڈیشنل کمشنر کراچی ون احمد علی قریشی نے دیگر افسران کے ہمراہ سبزی منڈی کا دورہ کر کے مارکیٹ کمیٹی کی کارکردگی کا جائزہ لیا۔
انھوں نے مارکیٹ کمیٹی کی جانب سے فروٹس اور سبزیوں کی قیمتوں کے تعین کے طریقہ کار کا معائنہ کیا۔ انھوں نے بعد ازاں کمشنر کراچی کومارکیٹ کمیٹی کے طریقہ کار کے بارے میں تفصیلی رپورٹ پیش کردی۔
ایڈیشنل کمشنر نے کمشنر کراچی کو مارکیٹ کمیٹی کے کردار کو مؤثر بنانے کے بارے میں اپنی تجاویز بھی پیش کیں۔ کمشنر کراچی نے مارکیٹ کمیٹی کو ہدایت کی ہے کہ وہ اس بات کویقینی بنائے کہ فروٹس اور سبزیوں کی قیمتوں کے تعین میں شفافیت نظر آئے ۔
انہوں نے کہا کہ فروٹس اور سبزیوں کی مناسب قیمتیں مقرر کی جائیں، اس بات کو یقینی بنایا جائے کہ لوگوں کو ماہ رمضان میں مناسب قیمت پر فروٹس اور سبزیاں دستیاب ہوں اور عوام قیمتوں کے سلسلہ میں ریلیف فراہم کرنے کے مقصد پورا ہو۔
