دبئی: متحدہ عرب امارات کی عدالت نے اردن سے تعلق رکھنے والے شخص کو اپنی ہم وطن خاتون کو بلیک میل کرنے کے الزام میں 9 ماہ کے لیے جیل بھیج دیا۔
عرب میڈیا کے مطابق دبئی کی عدالت نے اردن سے تعلق رکھنے والے 47 سالہ شخص کو اپنی ہم وطن 49 سالہ اردنی خاتون کو نازیبا ویڈیو بنا کر اسے بلیک میل کرنے کا جرم ثابت ہونے پر 9 ماہ قید کی سزا سنادی۔
اردنی خاتون نے بتایا کہ وہ 2016 میں اپنے ہم وطن 47 سالہ شخص سے اس قت ملی جب وہ کچھ فرنیچر اپنے آبائی وطن بھجوانا چاہتی تھی جس پر ملزم نے اس سے رابطہ کیا اور اس کا سامان بھجوایا۔
خاتون کے مطابق اس نے اپنے بیٹے کے ہمراہ ملزم کے اپارٹمنٹ میں بطور کرایہ دار عارضی طور پر رہائش اختیار کی کیونکہ اس کے گھر میں مرمت کا کچھ کام چل رہا تھا۔
مزید پڑھیں: امارات، واٹس ایپ پر بلاک کرنے پر بنگلہ دیشی شہری نے اپنی دوست کو قتل کردیا
چند دنوں بعد ملزم نے خاتون کو کھانے پر بلایا اور اسے بتایا کہ اس نے خاتون کی ان دنوں خفیہ ویڈیو بنالی تھی جب وہ اس کے اپارٹمنٹ میں مقیم تھی اور اگر اس کی بات نہ مانی گئی تو وہ سوشل میڈیا پر ویڈیو وائرل کردے گا۔
خاتون نے فوری طور پر پولیس کو اطلاع دی جس کے بعد ملزم کو گرفتار کرلیا گیا، عدالت میں مقدمے کی سماعت کے دوران ملزم کو بلیک میلنگ اور نجی زندگی میں مداخلت کا قصوروار ٹھہراتے ہوئے 9 ماہ قید کی سزا سنائی گئی اور ڈی پورٹ کرنے کا حکم بھی دے دیا گیا۔
