اسلام آباد: اسپیکر قومی اسمبلی اسد قیصر کا کہنا ہے کہ جمہوری عمل کے فروغ کے لیے سیاسی جماعتوں کا تعاون ناگزیر ہے۔
تفصیلات کے مطابق وفاقی دارالحکومت اسلام آباد میں چیئرمین سینیٹ صادق سنجرانی سے اسپیکر قومی اسمبلی اسد قیصر نے ملاقات کی اور اہم سیاسی امور پر تبادلہ خیال کیا۔ ملاقات کے دوران قائد ایوان سینیٹ سینیٹر شبلی فراز بھی موجود تھے۔
چیئرمین سینیٹ صادق سنجرانی نے کہا کہ قومی اسمبلی کی جانب سے آئینی امور پربھرپور تعاون حاصل رہا ہے، ایوان بالا نے بھی معاملات کی بہتری کے لیے ہمیشہ مثبت کردار ادا کیا۔
اسپیکرقومی اسمبلی اسد قیصر نے کہا کہ دونوں ایوانوں کے مابین تعاون کو مزید موثر بنانے کی ضرورت ہے، اپوزیشن جماعتوں کو ایوان بالا کی عزت واحترام کا خیال رکھنا چاہیے۔
اسپیکر قومی اسمبلی نے مزید کہا کہ جمہوری عمل کے فروغ کے لیے سیاسی جماعتوں کا تعاون ناگزیر ہے۔
پاکستان تحریک انصاف چیئرمین سینیٹ کے ساتھ کھڑی ہے، عثمان بزدار
یاد رہے کہ گزشتہ روز وزیراعلیٰ پنجاب سردار عثمان بزدار کا کہنا تھا کہ پاکستان تحریک انصاف اتحادی جماعتوں کے ساتھ مل کر چیئرمین سینیٹ کے خلاف تحریک عدم اعتماد کو ناکام بنائے گی-
سردار عثمان بزدار کا کہنا تھا کہ بلوچستان سے تعلق رکھنے والے صادق سنجرانی نے سینیٹ کی چیئرمین شپ کے عہدے کا حق ادا کیا ہے- صادق سنجرانی کے خلاف اپوزیشن کے منفی حربوں کا ڈٹ کر مقابلہ کیا جائے گا-
