لاہور: قومی احتساب بیورو (نیب) کے حکم پرشہباز شریف فیملی کے 150 بینک اکاؤنٹس منجمد کر دیے گئے.
تفصیلات کے مطابق نیب نے اپوزیشن لیڈر شہباز شریف کے خلاف بڑی کارروائی کرتے ہوئے ان کے 16 بینکوں میں موجود 150 اکاؤنٹس منجمد کردیے.
نیب کے اس اقدام کے بعد شہباز شریف فیملی منجمد اکاؤنٹس کے ذریعے کوئی لین دین نہیں کرسکے گی. حالیہ کارروائی میں حمزہ شہباز، رابعہ عمران، عائشہ ہارون کے اکاؤنٹس منجمد کئے گئے ہیں۔
نیب نے عمران یوسف،مقصود اینڈ کمپنی، نثاراحمد، مہر انسا حمزہ، نصرت شہباز شریف، شہبازشریف اور سلیمان شہبازشریف کے اکاؤنٹس منجمد کیے ہیں. مجموعی طور پر اکاؤنٹس 16 مختلف بینکوں میں موجود تھے.
مزید پڑھیں: شہباز شریف نے احتساب کو انتقام قرار دے دیا، حکومت پر کڑی تنقید
خیال رہے کہ سابق وزیر اعلیٰ پنجاب نے گزشتہ روز حکومت اور نیب پر کڑی تنقید کرتے ہوئے احتساب کے عمل کو انتقام قرار دیا تھا.
خصوصی پریس کانفرنس میں شہباز شریف نے کہا تھاکہ حکومت اور نیب نے نون لیگ کی قیادت پروار کیا، احتساب کے نام پر بدترین انتقام کا نشانہ بنایا جا رہا ہے. شاہد خاقان عباسی کا قصور نوازشریف کا ساتھی ہونا ہے، انھیں گرفتاری کے آرڈر کے بجائے واٹس ایپ میسج دکھایا گیا.
