کراچی : قومی ایئرلائن نے اپنے کپتانوں کو جدید تربیت دینے کا فیصلہ کیا ہے، جس کیلئے ایئربس320 کا فلائٹ سیمیولیٹر لیا جائے گا، اس اقدام سے پی آئی اے کو سالانہ لاکھوں ڈالر کی بچت ہوگی۔
تفصیلات کے مطابق پی آئی اے میں اصلاحاتی عمل جاری ہے اس سلسلے میں قومی ایئرلائن نے کپتانوں کو جدید خطوط پر تربیت دینے کیلئے ایئربس320 کا فلائٹ سیمیولیٹر لینے کا فیصلہ کیا ہے۔
سیمیولیٹر لینے کی منظوری گزشتہ دنوں پی آئی اے کے بورڈ آف ڈئریکٹرز کے اجلاس میں دی گئی تھی، پی آئی اے کے بیڑے میں طیاروں کی شمولیت اور سیمولیٹر کا اضافہ بزنس پلان کا حصہ ہے۔
اس حوالے سے ذرائع کا کہنا ہے کہ ایئر بس 320 کا فلائٹ سیمیولیٹر لینے کی شمولیت سے پی آئی اے کو سالانہ لاکھوں ڈالر کی بچت ہوگی۔
اس سے قبل پی آئی اے کے ایئربس 320 کے کپتان اور فرسٹ افسر اپنے لائسنس کی تجدید کیلئے سال میں دو دفعہ سیمیولیٹر پر تربیت حاصل کرنے کیلئے بیرون ملک جاتے تھے جس پر ہزاروں ڈالر کے اخراجات برداشت کر نا پڑ تے تھے۔
اس کے علاوہ کپتان اور فرسٹ آفیسر کے بیرون تربیت پر جانے سے پی آئی اے کا ڈیوٹی روسٹر بھی متاثر ہوتا تھا، ذرائع کے مطابق ایئربس 320 کے کپتان اور فرسٹ آفیسر 80 سے زائد ہیں۔
پی آئی اے کے سیمیولیٹر لینے سے اپنے کپتانوں کی تربیت کے علاوہ دوسری ایئرلائنز کے کپتانوں کو بھی تربیت دینے کی مد میں روینیو حاصل ہوگا۔
