کراچی : سول ایوی ایشن اتھارٹی کے اہلکار نے دیانتداری کی مثال قائم کرتے ہوئے بزرگ میاں بیوی کا قیمتی بیگ مالکان کے حوالے کردیا، سی اے اے حکام نے اہلکار کو شاباش دی۔
تفصیلات کے مطابق بزرگ میاں بیوی کی کروڑوں روپے کی گم شدہ جمع پونجی محفوظ ہاتھوں میں پہنچ گئی، جناح انٹرنیشنل ائیرپورٹ کراچی پر سی اے اے کے عملے نے دیانتداری کی نئی تاریخ رقم کردی۔
اس حوالے سے ذرائع کا کہنا ہے کہ بدھ کے روز انٹرنیشنل ارائیول لاؤنج میں سی اے اے اہلکار عارف نے ایک ہینڈ بیگ پڑا دیکھا، بیگ میں دوکروڑ روپے کے بچت سرٹیفیکیٹس اور دیگر سامان تھا۔
بیگ پر مالک کا نام اور فون نمبر بھی درج تھا، بعد ازاں بیگ کے مالک فیاض مرزا سے رابطہ کرکے ضروری تصدیق کرنے کے بعداسے بیگ لوٹا دیا گیا۔
بزرگ میاں بیوی برطانیہ سے پرواز ای کے چھ سو سے کراچی آئے تھے، بزرگ جوڑے نے ائیرپورٹ پر مامور سی اے اے کے عملے کی دیانتداری کو سراہا اور ان کا شکریہ ادا کیا۔
سی اے اے کی اعلی انتظامیہ اور ائیرپورٹ منیجر نے سی اے اے کے فیسیلیٹیشن کے عملے کو اس دیانتداری کا مظاہرہ کرنے پر شاباشی دی۔
