نئی دہلی : ایمنسٹی انٹرنیشنل انڈیا نے مقبوضہ کشمیرمیں کمیونیکیشن لاک ڈاؤن ایمنسٹی کا لاک ڈاؤن کے خاتمے کے لئے مہم کاآغاز کردیا ، کشمیرکے لئے آوازاٹھائیں کے ہیش ٹیگ کے ساتھ مہم چلائی جارہی ہے۔
تفصیلات کے مطابق ایمنسٹی انڈیا نے مقبوضہ کشمیر میں مواصلاتی رابطوں پر پابندی اور لاک ڈاؤن کے خاتمے کی مہم شروع کردی، کشمیرکے لئے آوازاٹھائیں کے ہیش ٹیگ سے شروع ہونے والی مہم کے تحت اس کے پیج پر جاکر کوئی بھی شخص اپنے نام اور ای میل ایڈریس کے ذریعے مقبوضہ کشمیر کے گورنر ستیاپال ملک کو ای میل کرے گا اور ان سے کشمیر میں پابندیاں ختم کرنے کا مطالبہ کرے گا۔
ایمنسٹی انٹرنیشنل انڈیا کے سربراہ آکار پٹیل نے کہا کہ ایک مہینہ ہونے کو آیا ہے جب سے کشمیریوں کی خیریت کی کوئی خبر نہیں سنی، ذرائع مواصلات پر مکمل پابندی کے باعث وہاں کے 80 لاکھ افراد کی زندگی پٹری سے اتر گئی ہے، رابطوں پر پابندی کشمیریوں کی شہری آزادی پر بدترین حملہ ہے۔
آکار پٹیل کا کہنا تھا کہ لاک ڈاؤن سے ہونے والے انسانی نقصان کو اجاگر کرنے کیلئے ایک عالمی مہم شروع کی جارہی ہے۔
ایمنسٹی انٹرنیشنل انڈیا نے کہا کہ ایک مہینے سے جاری کرفیو اور دیگر پابندیوں نے کشمیریوں کی روز مرہ زندگی، جذبات، ذہنی حالت، طبی سہولیات تک رسائی اور دیگر ضروریات زندگی تک رسائی کو بری طرح متاثر کیا ہے، ان پابندیوں کا دورانیہ اب مزید طویل نہیں ہونا چاہیے۔
ایمنسٹی انڈیا کا کہنا تھا کہ نیا کشمیر کشمیریوں کے بغیر نہیں بنایا جاسکتا، مقبوضہ کشمیر میں صرف مواصلاتی نظام کو ہی نہیں، بلکہ کشمیریوں کے دل و دماغ کو بھی بند کرنے کی کوشش کی جارہی ہے، حکومت ٹیلی فونز کو بحال کرنے کا دعوی کر رہی ہے لیکن 80 لاکھ کشمیریوں کو جھوٹے دعوؤں سے نہیں بہلایا جاسکتا۔
تنظیم نے مطالبہ کیا گورنر ستیاپال ملک انسانیت کو ترجیح دیں اور مقبوضہ کشمیر سے ذرائع مواصلات پر پابندی ختم کریں۔
