تل ابیب : اسرائیلی وزیر اعظم نیتن یاہو نے گفتگو کرتےہوئے کہا ہے کہ ’ایران بین الاقوامی سمندری نقل و حمل کے خلاف دشمنانہ کارروائیاں انجام دے رہا ہے‘۔
تفصیلات کے مطابق اسرائیلی وزیراعظم بنیامین نیتن یاہو نے ایران پر مزید دباؤ ڈالنے کا مطالبہ کیا ہے۔میڈیارپورٹس کے مطابق نیتن یاہو نے یہ بات لندن روانہ ہونے سے قبل دئیے گئے ایک بیان میں کہی، وہ لندن میں برطانوی وزیراعظم بورس جانسن اور امریکی وزیر دفاع ماریک ایسپر سے ملاقات کریں گے۔
اسرائیلی وزیراعظم کا کہنا تھا کہ یہ وقت ایران کے ساتھ بات چیت کرنے کے لیے مناسب نہیں بلکہ یہ تہران پر دباؤ بڑھا دینے کا وقت ہے۔
نیتن یاہو نے مزید کہا کہ جوہری معاہدے کے حوالے سے ایران کی خلاف ورزیاں جاری ہیں اسی طرح وہ بین الاقوامی سمندری نقل و حمل کے خلاف دشمنانہ کارروائیاں انجام دے رہا ہے اور اسرائیل میں ہلاک کر دینے والے حملے کر رہا ہے،یہ تمام امور مزید پابندیاں عائد کرنے کا سبب ہیں۔
غیر ملکی میڈیا کا کہنا تھا کہ اس بات کی توقع ہے کہ ایران جوہری معاہدے کی عدم پاسدارای کے حوالے سے اضافی اقدامات کا اعلان کرے گا۔
اگر یورپ امریکی پابندیوں کے سائے میں ایران کے تیل کی فروخت کا حل فراہم کرنے میں ناکام رہا تو تہران اپنی جوہری سرگرمیوں کو تیز کر دے گا۔
