کیلی فورنیا: موبائل فون بنانے والی معروف کمپنی ایپل نے آئی فون کے پرانے سیٹ رکھنے والے صارفین کو خبردار کیا ہے کہ اگر انہوں نے اپنے موبائل کا سافٹ ویئر اپ ڈیٹ نہیں کیا تو فون بند ہوجائے گا۔
غیر ملکی خبررساں ادارے کی رپورٹ کے مطابق کمپنی کی جانب سے اعلان کیا گیا ہے کہ آئی فون 5 یا اُس سے پہلے کے سیٹ رکھنے والے صارفین گرین وچ ٹائم کے مقامی وقت کے مطابق 2 نومبر کی رات 12 بجے سے پہلے اپنے آپریٹنگ سسٹم اپ ڈیٹ کرلیں۔
آئی فون کی جانب سے جاری اعلامیے میں صارفین کو کہا گیا ہے کہ وہ اپنے اسمارٹ فون میں آئی او ایس 10.3.4 اپ ڈیٹ کریں، جو صارفین آپریٹنگ سسٹم کو مقررہ تاریخ تک اپ ڈیٹ نہیں کریں گے تو اُن کے موبائل فون پر انٹرنیٹ سروس کی فراہمی بند ہوجائے گی البتہ کالز اور ایس ایم ایس کے لیے ڈیوائس قابل استعمال ہوگی۔
مزید پڑھیں: چینی موبائل کمپنی آئی فون سے مقابلہ کرنے کے لیے تیار
کمپنی نے وضاحت کی ہے کہ پرانے سسٹم رکھنے والے صارفین ویب براؤزر سفاری، ای میلز، ایپ اسٹور، آئی کلاؤڈ اور میپس بھی استعمال نہیں کرسکیں گے، اس کے علاوہ آئی پیڈ کے سافٹ ویئر کو بھی اپ ڈیٹ کرنا ضروری ہے۔
ایپل کے ترجمان کا کہنا تھا کہ ’’سافٹ ویئراپ گریڈ کرنے کا معاملہ جی پی ایس کی وجہ سے پیش آیا، یہ تقریباً ہر 19 سال بعد ہوتا ہے جس کی وجہ سے رواں سال اپریل میں صارفین کو مشکلات کا سامنا بھی کرنا پڑا‘‘۔
کمپنی کے مطابق اپریل میں آنے والے بگ (تکنیکی خرابی) کو ٹھیک کرنے کے لیے اقدامات کیے گئے البتہ اُس میں ماہرین کو خاطر خواہ کامیابی نہیں ملی، آئی او ایس 10.3.4 اور 9.3.6 یا بعد کے سسٹم کو اپ ڈیٹ کر کے خامی کو دور ضرور کیا جاسکتا ہے۔
