چیئرمین پی سی بی محسن نقوی نے ٹیم کے ہیڈ کوچز کی رونمائی کر دی پہلی بار وائٹ اور ریڈ بال کے لیے الگ الگ کوچز کا تقرر کیا گیا ہے۔
چیئرمین پاکستان کرکٹ بورڈ محسن نقوی نے لاہور میں پریس کانفرنس کرتے ہوئے گیری کرسٹن کو وائٹ بال اور جیسن گلیپسی کو ریڈ بال کوچ مقرر کرنے کا اعلان کیا جب کہ اظہر محمود دونوں فارمیٹ میں اسسٹنٹ کوچ ہوں گے۔
محسن نقوی نے کہا کہ کرکٹ بورڈ کا کام ہے پیسے اپنی کرکٹ اور ٹیم پر لگائے۔ جتنی اہمیت مینز کرکٹ کی ہے اتنی ہی ویمنز کرکٹ کی بھی ہے، اسی لیے ویمن کرکٹ ٹیم کے کوچ کے تقرر پر بھی کام شروع کر دیا ہے۔
ان کا کہنا تھا کہ اظہرمحمود اپنی فیملی کو چھوڑ کر برطانیہ سے پاکستان صرف ملک کے لیے آئے ہیں اور مجھے یقین ہے وہ پاکستان کرکٹ کی بہتری کے لیے بھرپور کردار ادا کریں گے۔
انہوں نے بتایا کہ گیری کرسٹن انگلینڈ کے دورے پر ٹیم کو جوائن کریں گے۔ ڈومیسٹک کرکٹ کیلیے اکیڈمیز کو بہتر کر رہے ہیں۔ تبدیلیاں حصہ ہیں لیکن حکومت اور پی سی بی مستحکم ہے، نائب کپتان مقرر کرنے کا اختیار سلیکشن کمیٹی کو دیا ہے۔
چیئرمین پی سی بی نے کہا کہ 4 سے 5 ماہ میں ملکی اسٹیڈیمز کو اپ گریڈ کرنا ہے۔ اس کے لیے ہم نے بین الاقوامی کمپنیوں سے رابطہ کیا ہے اور 7 مئی کو انٹرنیشل بڈ ہے۔
