نیویارک: آپ کے طیارے میں پائلٹ نہیں تو آپ پریشان نہ ہوں، کیوں کہ اب مسافر خود طیارے کو بغیر پائلٹ کے لینڈ کروا سکیں گے۔
تفصیلات کے مطابق بین الاقوامی میڈیا رپورٹس میں بتایا گیاہے کہ ایک جی پی ایس سروس فراہم کرنے والی کمپنی نے ایسی ٹیکنالوجی تیار کی ہے جو ایمرجنسی کی صورت میں طیارے کو بحفاظت لینڈ کرواسکتی ہے۔
’آٹولینڈ‘ نامی یہ سافٹ ویئر امریکی ٹیکنالوجی کمپنی ’گرمن‘ کی جانب سے چھوٹے طیاروں میں فلائٹ ٹولز کے حصے کے طور پر دستیاب ہو گی۔
یہ سافٹ ویئر پائلٹ کی سرگرمیوں پر نظر رکھے گا اگر پائلٹ کی جانب سے نیویگیشن نظام پر کوئی ردعمل نہ ملا تو یہ خود کار نظام کے تحت نزدیکی ہوائی اڈے کو سگنلز بھیج کر انداز لگائے گا کہ ایمرجنسی لینڈنگ کے لیے کونسی جگہ زیادہ محفوظ ہے۔
محفوظ مقام تلاش کرنے کے بعد یہ سافٹ ویئر طیارے کو اپنے طور پر اس مقام کی جانب لے جائے گا اور بحفاظت لینڈنگ کو یقینی بنائے گا۔
آٹو لینڈ کو مسافر اپنے طور پر فعال کرسکتے ہیں اس کے لیے طیارے کے مین کیبن میں پائلٹ کی نشست کے بالکل سامنے ایک ٹچ پینل نصب کیا جائے گا.
حالیہ عرصے کے دوران چھوٹے طیاروں کے کریش ہونے کے متعدد واقعات سامنے آئے ہیں جس میں کئی لوگ اپنی جان گنوا بیٹھے ہیں۔
ماہرین کا کہنا ہے کہ زیادہ تر حادثات ٹیک آف اور لینڈنگ کے دوران پیش آئے جن میں لینڈنگ کے دوران رونما ہونے والے واقعات کی تعداد زیادہ ہے۔
