ٹوکیو : جاپانی کسٹم حکام نے کوبی شہر کی بندرگاہ سے 7 کروڑ 30 لاکھ ڈالر مالیت کی 400 کلو افیون پکڑ لی۔
غیرملکی خبررساں ادارے کے مطابق حکام نے بتایا کہ شہر میں منشیات کے حوالے سے یہ انکشاف گزشتہ ماہ کیا گیا تھا جس کے بعد انہوں نے فوری کارروائی کرتے ہوئے منشیات پکڑی جو مقدار کے لحاظ سے جاپان میں پکڑی جانے والی منشیات کی سب سے بڑی کھیپ ہے۔
حکام کا کہنا تھا کہ وہ اس حوالے سے فی الحال اضافی معلومات فراہم نہیں کر سکتے کیونکہ ابھی اس کی مزید تحقیقات جاری ہیں۔
- Advertisement -
اس کارروائی سے چند ماہ قبل بھی جاپانی کسٹم حکام نے وسطی جاپان کے صوبے ایچی کی بندرگاہ سے 177 کلو گرام افیون پکڑی تھی۔
رپورٹس کے مطابق اس حوالے سے اب تک کوئی معلومات سامنے نہیں آسکی ہیں کہ یہ افیون کہاں سے لائی گئی ہے تاہم جاپانی حکام کا خیال ہے کہ غلطی سے یہ افیون جاپان پہنچ گئی ہے۔
