پاکستان سمیت دنیا بھر میں آج برداشت اور رواداری کا اہم ترین عالمی دن منایا جا رہا ہے۔
ایک طرف جہاں پاکستان سمیت دنیا بھر میں انسانوں کے مابین عدم برداشت کا رویہ تیزی سے پروان چڑھ رہا ہے، وہاں دوسری طرف انھیں آج کے دن یہ یاد دلایا جاتا ہے کہ برداشت اور رواداری ان ہی کی خصوصیات ہیں، جنھیں وہ بھلا بیٹھے ہیں۔
اس دن (16 نومبر) کو بین الاقوامی سطح پر منانے کا مقصد معاشرے میں برداشت اور صبر و تحمل کی اہمیت اور عدم برداشت کے منفی اثرات سے آگاہی فراہم کرنا ہے، یہ دن ہمیں بتاتا ہے کہ عدم برداشت سے معاشرے میں تنازعات اور جھگڑے بڑھ رہے، اس لیے ہمیں کچھ دیر کے لیے رک کر اپنا احتساب کرنا چاہیے۔
کیا ہم یہ سوچنے کے لیے تھوڑا سا وقت نکالنا پسند کریں گے، کہ ہم نے آخری مرتبہ کب اپنے کسی عزیز یا دوست کے ساتھ اختلاف رائے کیا تھا، اس وقت ہمارا رویہ کیا تھا، اور آخری مرتبہ ہم نے کب اپنے قریب رہنے والوں یا دفاتر میں دوسری زبان بولنے والوں کی ثقافت اور روایات سے متعلق کچھ معلوم کیا تھا؟
اس اہم دن کے منانے کا آغاز بھی 1995 میں بہت سارے دیگر عالمی اور بین الاقوامی دنوں کی طرح اقوام متحدہ کی جنرل اسمبلی نے کیا، تاکہ ایسے تعلیمی ادارے بنائے جا سکیں جن کی مدد سے عام لوگ برادشت کو معاشرے کا اہم ترین عنصر سمجھنا شروع کریں۔
