سوات: وفاقی وزیر مواصلات مراد سعید نے سوات میں اسپتال کا افتتاح کیا، تقریب سے خطاب کرتے ہوئے ان کا کہنا تھا کہ خیبر پختونخوا کو بھی سی پیک کا حصہ بنایا جائے گا۔
تفصیلات کے مطابق وفاقی وزیر مواصلات مراد سعید نے سوات میں اسپتال کی افتتاحی تقریب سے خطاب کرتے ہوئے کہا کہ سوات میں اربوں کے میگا پراجیکٹس پر کام جاری ہے، کبل سمیت ضلع بھر میں سڑکوں کا جال بچھایا جا رہا ہے۔
مراد سعید کا کہنا تھا کہ چکدرہ ٹو مدین موٹر وے 52 ارب روپے سے تعمیر ہوگا، چکدرہ سے چترال تک روڈ سی پیک میں بنائیں گے۔
انہوں نے کہا کہ خیبر پختونخوا کو بھی سی پیک کا حصہ بنایا جائے گا، سوات کی ترقی کے لیے مل کر کام کریں گے۔
چند روز قبل مراد سعید نے قومی اسمبلی میں بتایا تھا کہ گزشتہ دور حکومت میں ہزارہ موٹر وے کو تیار بتا کر غلط بیانی کی گئی، ڈیزائن میں تبدیلی سے منصوبے کے وقت اور لاگت میں اضافہ ہوا۔
انہوں نے کہا تھا کہ ریکارڈ درست کرلیں ہزارہ موٹر وے کا ڈیزائن تبدیل کیا گیا، ہزارہ موٹر وے میں 45 فٹ کا پل شامل کیا گیا، اس پل کا مقصد کسی کو نوازنا تھا۔ منصوبے کے 2 ارب 70 کروڑ روپے ریکور کرلیے ہیں۔
