اسلام آباد: وزیر خارجہ شاہ محمود قریشی کا کہنا ہے کہ باہمی احترام اور قدروں کو فروغ دینے کی ضرورت ہے، مہذب معاشروں میں ایک دوسرے کے مذہب،عقائد کا احترم کیا جاتا ہے۔
تفصیلات کے مطابق وزیرخارجہ شاہ محمود قریشی نے اے آروائی نیوز سے گفتگو کرتے ہوئے کہا کہ ناروے کی حکومت نے ہمارے احتجاج پر فوری ایکشن لیا، ناروے سفیر کو دفترخارجہ طلب کر کے تشویش کا اظہار کیا گیا تھا۔
شاہ محمود قریشی نے کہا کہ بین مذاہب ہم آہنگی کے لیے ایک دوسرے کے جذبات کی قدر کرنا ہوگی، باہمی احترام اور قدروں کو فروغ دینے کی ضرورت ہے۔
وزیر خارجہ نے کہا کہ مہذب معاشروں میں ایک دوسرے کے مذہب،عقائد کا احترم کیا جاتا ہے، مسلم امہ کو ایسے معاملات پر یکسوئی دکھانا ہوگی۔
ناروے حکومت نے پولیس کو قرآن پاک کی بے حرمتی روکنے کا حکم دے دیا
یاد رہے کہ گزشتہ روز قرآن پاک کی بے حرمتی پر پاکستان کی جانب سے سخت ردِ عمل کے بعد ناروے حکومت بھی اقدامات پر مجبور ہو گئی۔ ناروے کی حکومت نے قرآن پاک کی بے حرمتی روکنے کا حکم جاری کر دیا۔
پولیس کو قرآن پاک کی بے حرمتی روکنے کے احکامات کے ساتھ ناروے حکومت نے ایسے واقعات کی روک تھام کو بھی لازمی قرار دے دیا ہے۔
