ریاض: دوران پرواز سعودی خاتون نے بچے کو جنم دے دیا، خوش قسمتی سے جہاز پر اس وقت ایک لیڈی ڈاکٹر اور نرس بھی موجود تھیں جن کی وجہ سے زچگی کا معاملہ احسن انداز میں مکمل ہو گیا۔
تفصیلات کے مطابق السعودیہ ایئر کی پرواز sv 1228 سعودی عرب کی شمالی کمشنری عرعر سے ریاض کے لیے روانہ ہوئی، فلائٹ کی روانگی سے قبل جہاز کے عملے اور گراؤنڈ کنٹرول کو اس امر کی اطلاع نہیں تھی کہ فلائٹ پر مسافرخواتین میں ایک حاملہ بھی سفر کر رہی ہیں جن کے یہاں کسی بھی وقت ولادت متوقع ہے ۔
فلائٹ اپنے وقت مقررہ پر روانہ ہوئی ابھی جہاز کو فضا میں سفر کرتے ہوئے ایک گھنٹہ ہی ہوا تھا کہ ایک مسافر خاتون کو درد زاہ ہوا جس پر عملے کو اس کی اطلاع دی گئی۔
جہاز کا عملہ اس اطلاع سے سخت پریشان ہو گیا کیونکہ فلائٹ پر ایسا کوئی انتظام نہیں تھا جس کے تحت زچگی کے معاملے کو نمٹایا جاسکے۔ کیپٹن نے مسافروں سے التماس کی کہ اگر کوئی لیڈی ڈاکٹر یا طبی عملہ فلائٹ پر موجود ہو تو وہ عملے سے رجوع کرے۔
کیپٹن کا اعلان سنتے ہی جہاز میں موجود ایک لیڈی ڈاکٹرنے فوری طور پر اپنی خدمات مہیا کر دیں، جہاز کے عملے نے زچہ خاتون کو جہاز کے عقبی حصہ میں منتقل کیا جہاں لیڈی ڈاکٹر اور نرس کی معاونت سے خاتون نے صحت مند بچے کو جنم دیا۔
