اسلام آباد : اسلام آباد ہائی کورٹ کی تاریخ کی پہلی خاتون جج لبنیٰ سلیم پرویز نے حلف اٹھا لیا ، انھیں ایک سال کےلیے بطور ایڈیشنل جج تعینات کیا گیا ہے۔
تفصیلات کے مطابق اسلام آباد ہائی کورٹ کے ججز کی حلف براداری کی تقریب منعقد ہوئی ، جس میں جسٹس عامرفاروق، جسٹس محسن اختر کیانی اور جسٹس میاں گل حسن اورنگزیب سمیت وکلا کی کثیر تعداد نے شرکت کی۔
تقریب میں اسلام آباد ہائی کورٹ میں پہلی خاتون جج سمیت 3 نئے ججز نے حلف اٹھایا ، چیف جسٹس اسلام آباد ہائی کورٹ جسٹس اطہر من اللہ نے تینوں نئے ججز سے حلف لیا۔
نئے ججز میں پہلی خاتون جج لبنیٰ سلیم پرویز بھی شامل ہیں جبکہ دیگر 2 ججز میں فیاض احمد جندران اورغلام اعظم قمبرانی شامل ہیں، تینوں ججز کو ایک سال کی مدت کے لیے بطور ایڈیشنل جج تعینات کیا گیا ہے۔
یہ امر قابل ذکر ہے کہ ہائی کورٹ بار کے بائیکاٹ کے باوجود حلف برداری کی تقریب میں وکلا بڑی تعداد میں شریک ہوئے۔
یاد رہے کہ جسٹس طاہرہ صفدر کو پاکستان ہائی کورٹ کی تاریخ کی پہلی خاتون جج بننے کا اعزاز حاصل ہے، انھوں نے جسٹس چیف جسٹس بلوچستان ہائی کورٹ کے عہدے کاحلف اٹھایا تھا۔
جسٹس سیدہ طاہرہ صفدر پہلی خاتون ہیں جو بلوچستان میں سول جج بنیں اور انہیں یہ امتیاز بھی حاصل رہا ہے کہ جن عہدوں پر انہوں نے کام کیا ہے وہ ان عہدوں پر کام کرنے والی بلوچستان کی پہلی خاتون ہیں۔
