کراچی: قومی ٹیم کے نوجوان اوپنر عابد علی نے ٹیسٹ کرکٹ میں ایک اور ریکارڈ بنادیا۔
تفصیلات کے مطابق کراچی میں کھیلے جانے والے دوسرے ٹیسٹ میچ کے تیسرے روز عابد علی ابتدائی 2 ٹیسٹ میچ میں سنچری بنانے والے پہلے پاکستانی کرکٹر بن گئے۔
عابد علی نے 174 رنز کی شاندار اننگز کھیلی، ان کی اننگز میں ایک چھکا اور 21 چوکے شامل تھے۔
رپورٹ کے مطابق عابد علی مجموعی طور پر یہ اعزاز حاصل کرنے والے دنیا کے نویں کرکٹر بن گئے ہیں، علاوہ ازیں شان مسعود اور عابد علی کا نام نیشنل اسٹیڈیم کے آنر بورڈ میں بھی درج کرلیا گیا ہے۔
اوپنر بلے باز نے 137 گیندوں پر سنچری مکمل کی تو ڈریسنگ روم سے ہیڈ کوچ مصباح، بولنگ کوچ وقار یونس اور ساتھی کھلاڑیوں نے تالیاں بجا کر مبارک باد پیش کی۔
Abid Ali and Shan Masood get their names on the NSK honours boards. #PAKvSL @AbidAli_Real @shani_official pic.twitter.com/7TgfroOxLF
— Pakistan Cricket (@TheRealPCB) December 21, 2019
عابد علی نے میڈیا سے گفتگو کرتے ہوئے کہا کہ 80 رنز کی لیڈ ہوگئی تھی ہم پر پریشر تھا، کوشش کرتا ہوں پرفارمنس سے ٹیم کو فائدہ پہنچاؤں، ڈومیسٹک کرکٹ کھیلنے کی وجہ سے اعتماد ملا۔
انہوں نے کہا کہ اپنی غلطیوں پر مزید کام کررہا ہوں، حریف ٹیمیں بیٹسمینوں کے خلاف پوری تیاری سے آتی ہیں، 174 رنز پر آؤٹ ہوا جس کا افسوس ہے۔
عابد علی نے کہا کہ شان مسعود اور میں فرسٹ کلاس سیزن ساتھ کھیلتے رہے ہیں، کوئی بھی فارمیٹ ہو میرا کام پرفارم کرنا ہے، پی ایس ایل میں نام نہیں ہے تاہم اس کا کوئی افسوس نہیں ہے۔
