لاہور: حکومت نے تمام ویکسی نیٹرز کی لوکیشن کو جیو ٹیگ سے مانیٹر کرنے کا فیصلہ کیا ہے۔
تفصیلات کے مطابق بچوں کو بیماریوں سے محفوظ کرنے کے جامع ویکسی نیشن کے منصوبے کی تیاری کی جا رہی ہے، اب ویکسی نیٹرز کی لوکیشن کو جیو ٹیگ سے مانیٹر کیا جائے گا۔
اس سلسلے میں آج لاہور میں سیکریٹری پرائمری اینڈ سکینڈری ہیلتھ کئیر کی زیر صدارت اجلاس منعقد ہوا جس میں اہم فیصلے کیے گئے۔
اجلاس میں یہ فیصلہ کیا گیا کہ جیو ٹیگ مانیٹرنگ سے ویکسی نیٹر کے ہر علاقے میں پہنچنے کو یقینی بنایا جائے گا، اور اپنی مرضی کے علاقوں میں مانیٹرنگ کے لیے جانے والوں کی بھی نشان دہی کی جائے گی۔
یہ بھی پڑھیں: انسداد پولیو مہم ملک بھر میں کامیاب، 99 فیصد بچوں کو قطرے پلانے کی تصدیق
خیال رہے کہ چند دن قبل وزارت صحت کی جانب سے کہا گیا تھا کہ انسداد پولیو مہم ملک بھر میں کام یاب ہو گیا ہے، مہم کے دوران 99 فی صد بچوں کو قطرے پلائے گئے، اس مہم میں مجموعی طور پر 2 لاکھ 65 ہزار پولیو ورکرز نے حصہ لیا تھا۔
انسداد پولیو مہم کے خاتمے پر معاون خصوصی برائے صحت ڈاکٹر ظفر مرزا نے بیان دیتے ہوئے کہا کہ رواں سال اب تک 111 پولیو کیس رپورٹ ہوئے جس کے بعد مہم کی اہمیت اور بڑھ گئی تھی، بلوچستان اور خیبر پختون خواہ کے اضلاع سے ابھی اعداد و شمار آنا باقی ہیں مگر ابھی تک سامنے آنے والے اعداد و شمار کے مطابق 39.1 ملین (99 فی صد) بچوں کو حفاظتی قطرے پلائے جا چکے ہیں۔
