بغداد: عراق میں امریکی سفات خانے پر حملے کے بعد آج بھی مظاہرے کا سلسلہ جاری ہے، سفارت خانے کے اطراف بھاری نفری تعینات کردی گئی۔
تفصیلات کے مطابق عراقی دارالحکومت بغداد میں امریکی سفارت خانے کے باہر مظاہرہ کیا جارہا ہے، جبکہ پولیس اور شہریوں کے درمیان جھڑپیں بھی ہوئیں، ردعمل میں امریکی سیکیورٹی اہلکاروں نے مظاہرین پر آنسوگیس کی شیلنگ کی۔
امریکا نے سفارت خانے کے قریب مزید 750اہلکار تعینات کردیے۔
بغداد میں عراقی اور امریکی فوجیوں کا بھاری دستہ سیکیورٹی کے فرائض انجام دے رہا ہے، جبکہ کسی بھی ناخوشگوار واقعے سے نمٹنے کے لیے اہلکار ہائی الرٹ ہیں۔ گزشتہ روز مشتعل مظاہرین نے امریکی سفارت خانے پر توڑ پھوڑ کی تھی۔
یہ احتجاج شام اور عراق میں ملیشیا کے ٹھکانوں پر امریکی کارروائی کے خلاف کیا جارہا ہے۔
نئے سال کا آغاز، ٹرمپ نے مبارکباد کے بجائے دھمکی دے ڈالی
خیال رہے کہ امریکی صدر ڈونلڈ ٹرمپ نے نئے سال کے آغاز پر ایران کو سنگین نتائج کی دھمکی دے ڈالی، یہ دھمکی عراق میں امریکی سفارت خانے پر حملے کے تناظر میں سامنے آئی۔
امریکی صدر نے سماجی رابطے کی ویب سائٹ ٹوئٹر پر ٹوئٹ کیا اور عراق میں امریکی سفارت خانے پر حملے کی شدید الفاظ میں مذمت کی، ٹرمپ نے الزام عائد کیا کہ ان حملوں میں ایران ملوث ہے۔
