اسلام آباد: مشیر خزانہ عبدالحفیظ شیخ نے کہا ہے کہ ابوظبی کے ولی عہد شیخ محمد بن زید النہیان نے وزیراعظم عمران خان سے ملاقات میں 200 ملین ڈالرز کی سپورٹ کا اعلان کیا ہے۔
تفصیلات کے مطابق مشیر خزانہ عبدالحفیظ شیخ نے سماجی رابطے کی ویب سائٹ ٹویٹر پر اپنے پیغام میں کہا ہے کہ ابوظبی کے ولی عہد نے 200 ملین ڈالرز کی سپورٹ کا اعلان کیا ہے، ان کے تعاون کرنے پر شکر گزار ہیں۔
مشیر خزانہ عبدالحفیظ شیخ نے کہا کہ 200 ملین ڈالرز چھوٹے کاروبار اور روزگار کے لیے استعمال ہوں گے، مالی تعاون دونوں ممالک میں گہرے تعلقات کا عکاس ہے۔
2/2)
The money will be spent on small business promotion and jobs. This support is testimony to the expanding economic relations and friendship between our countries.— Dr. Abdul Hafeez Shaikh (@a_hafeezshaikh) January 2, 2020
واضح رہے کہ ابوظبی کے ولی عہد شیخ محمد بن زید النہیان ایک روزہ دورے پر پاکستان پہنچے تھے، شیخ محمد بن زید النہیان کی وزیراعظم سے ون آن ون ملاقات ہوئی تھی جس میں خطے کی مجموعی صورت حال پر تبادلہ خیال کیا گیا تھا۔
وزیراعظم نے کہا تھا کہ ملک میں معیشت کی بحالی کے بعد سرمایہ کاری کے مواقع بڑھے ہیں، پاکستان اپنے شراکت دار ممالک سے تجارت، سرمایہ کاری جاری رکھنا چاہتا ہے، یو اے ای کی مختلف شعبوں میں سرمایہ کاری میں دلچسپی کا خیرمقدم کرتے ہیں۔
مزید پڑھیں: وزیراعظم اور ابوظبی کے ولی عہد کی ملاقات کا اعلامیہ جاری
ابوظبی کے ولی عہد شیخ محمد بن زید النہیان نے پاک یو اے ای تعلقات کی اسٹریٹیجک اہمیت پر زور دیا۔ ولی عہد نے او آئی سی میں پاکستان کے اہم کردارکو بھی سراہا۔
یاد رہے جنوری 2019 میں بھی ابوظبہی کےولی عہد نے پاکستان کا دورہ کیاتھا جبکہ گذشتہ سال نومبر میں وزیراعظم عمران خان کا ابوظہبی کے ولی عہد شیخ محمد بن زید النیہان سے ٹیلی فونک رابطہ ہوا تھا، جس میں دونوں رہنماؤں نے باہمی تعلقات اور اہم عالمی امور پرتبادلہ خیال کیا گیا تھا۔
