ٹیکنالوجی کی سہولیات آنے کے بعد سے لوگوں کا طور زندگی یکسر تبدیل ہوگیا، گزرے زمانوں میں نئے سال کی مبارک باد کے لیے خطوط لکھے جاتے تھے پھرٹیلی فون آنے کے بعد یہ سلسلہ ختم ہوا اور پھر دیکھتے ہی دیکھتے موبائل فون متعارف ہوگئے۔
موبائل متعارف ہونے کے بعد ایس ایم ایس یا کال کے ذریعے ایک دوسرے سے رابطے استوار کیے جاتے تھے اور نئے سال، تہواروں کی مبارک باد دی جاتی تھی مگر اسمارٹ فون جب سے آیا تو زمانہ یکسر تبدیل ہوگیا۔
پہلے صرف کال پر بات ہوتی تھی یا الفاظ کو ایس ایم ایس کی صورت بھیج کر اپنے جذبات کا اظہار کیا جاتا تھا مگر عصر حاضر میں ایسی ٹیکنالوجیز متعارف ہوگئیں کہ آپ اپنی آواز اور ویڈیو کے ساتھ اپنے دوست، عزیز یا رشتے دار سے باآسانی رابطہ کرسکتے ہیں۔
سماجی رابطے کی سب سے بڑی موبائل اپیلیکیشن واٹس ایپ نے آتے ہی ساری کایا پلٹ دی اور دیکھتے ہی دیکھتے یہ ایپ دنیا بھر میں استعمال ہونے لگی، آج واٹس ایپ کے دنیا بھر میں صارفین کی تعداد ایک کھرب سے زائد ہوچکی ہے۔
مزید پڑھیں: مخصوص موبائل پر واٹس ایپ بند
کمپنی کی جانب سے جاری اعلامیے میں بتایا گیا ہے کہ اکتیس دسمبر کو 1 کھرب صارفین نے ایک دوسرے کو ایپ کے ذریعے نئے سال کے پیغامات ایک دوسرے کو ارسال کیے، ان پیغامات میں تصاویر اور ویڈیوز بھی شامل تھیں۔
واٹس ایپ کے مطابق یہ ایک ریکارڈ ہے کیونکہ اس سے قبل صارفین نے اتنی بڑی تعداد میں کبھی پیغامات ارسال نہیں کیے تھے۔ بھارت دنیا کا وہ واحد ملک ہے کہ جس کے تقریباً 2 ارب صارفین نے ایک دوسرے کو مبارک باد کے پیغامات ارسال کیے۔
