تہران: ایرانی وزیرخارجہ جواد ظریف کا کہنا ہے کہ امریکا شور مچائے یا چیخے چلائے، اس کا مغربی ایشیا میں اختتام کا آغاز ہوگیا ہے۔
تفصیلات کے مطابق سماجی رابطے کی ویب سائٹ ٹوئٹر پر اپنے ایک بیان میں ایرانی وزیرخارجہ کا کہنا تھا کہ جمعے کو حملے کرکے عالمی قوانین کی خلاف ورزی کی گئی، امریکی صدد ھمکیاں دے کر پھر عالمی قوانین کی خلاف ورزی کرنا چاہتے ہیں۔
ان کا مزید کہنا تھا کہ ثقافتی جگہوں کو نشانہ بنانا جنگی جرم ہے۔
دریں اثنا چینی وزیر خارجہ نے ایرانی ہم منصب سے فون پر رابطہ کیا۔ اس موقع پر چینی وزیرخارجہ کا کہنا تھا کہ چین مشرقی وسطیٰ میں امن کے لیے کلیدی کردار ادا کرے گا۔
جبکہ جواد ظریف نے مؤقف اختیار کیا کہ ایران نے اقوام متحدہ کو خط لکھ دیا ہے، امید ہے چین خطے میں کشیدگی ختم کرنے کے لیے کردار ادا کرے گا۔ چین نے امریکا پر زور دیا ہے کہ طاقت کا بےجا استعمال نہ کیا جائے۔
ٕ’ایران جنرل سلیمانی کی موت کا جواب کسی بھی وقت دے دے گا‘
یاد رہے کہ گزشتہ روز اپنے ایک بیان میں ایران کے وزیر خارجہ جواد ظریف نے اس امر کا کھل کر اشارہ دے دیا کہ ایران اپنے جنرل کی موت کا جواب ضرور دے گا، انھوں نے کہا تھاکہ ایران اپنے منتخب کردہ وقت پر جواب دینے کا حق رکھتا ہے۔
جواد ظریف کا کہنا تھا کہ امریکا نے حملہ کر کے 3 بڑی غلطیاں کی ہیں، ایک تو امریکا نے عراق کی خود مختاری اور دوم عالمی قوانین کی خلاف ورزی کی، سوم امریکا نے خطے کے عوام کے جذبات کو شدید ٹھیس پہنچائی۔ ایران امریکا کی مذموم مہم اور بلیک میلنگ میں ملوث نہیں ہوگا۔
