بھارت میں لوک سبھا کے انتخابات کے سلسلے میں سیاسی گرما گرمی بھی جاری ہے ایک مسلمان سیاسی کارکن کو کارنر میٹنگ کے دوران قتل کر دیا گیا۔
بھارت میں لوک سبھا کے انتخابات کے سلسلے میں سیاسی میدان گرم ہے۔ سیاسی جماعتیں ایک دوسرے پر روایتی الزام تراشی کر رہی ہیں۔ اسی دوران پڑوسی ملک کے یہ دل دہلا دینے والی خبر آئی ہے کہ کانگریس کے مقامی مسلمان کارکن کو پارٹی کی کارنر میٹنگ کے دوران دردناک انداز میں قتل کر دیا گیا۔
انڈین میڈیا کے مطابق یہ واقعہ حیدرآباد دکن کے علاقے راجندر نگر، حسن نگر میں پیش آیا جہاں کانگریس کی ایک کارنر میٹنگ جاری تھی کہ اس میں شریک ایک کارکن محمد مقبول کو حملہ کر کے قتل کر دیا گیا۔
رپورٹ کے مطابق دوران میٹنگ قتل کی اس لرزہ خیز واردات کے بعد وہاں خوف وہراس پھیل گیا اور کارنر میٹنگ میں سیاسی رہنماؤں کو سننے کے لیے آنے والے لوگ بھاگ کھڑے ہوئے۔
اطلاع ملتے ہی پولیس جائے وقوعہ پر پہنچ گئی جب کہ مقتول کی شناخت مقبول کے نام سے ہوئی ہے جو ٹیکسی ڈرائیور ہے۔
قتل کی وجہ پرانی مخاصمت اور رقم کی لین دین کا تنازع بتایا جاتا ہے۔ مقامی لوگوں کا کہنا ہے کہ ملزم اسکریپ کا کاروبار کرتا ہے۔ پولیس نے واقعے کی تحقیقات شروع کر دی ہے۔
