کوالالمپور : ملیشیا کے وزیراعظم مہاتیر محمد نے قاسم سلیمانی کے قتل کو غیر اخلاقی قرار دے دیا اور کہا اب مسلمانوں کو متحد ہونا چاہیے۔
تفصیلات کے مطابق ملیشیا کے وزیراعظم مہاتیر محمد نے ایرانی جنرل قاسم سلیمانی کی موت کو غیر اخلاقی فعل قرار دیتے ہوئے اس کا موازنہ سعودی صحافی جمال خشوگی کے قتل سے کیا اور کہا مسلمانوں کو بیرونی خطرات سے بچنے کے لیے متحد ہونا چاہیے۔
ڈاکٹر مہاتیر نے کہا کہ امریکی کارروائی نہ صرف ملک کے قوانین کے خلاف تھی بلکہ دنیا کے قوانین کے بھی خلاف ہے۔
ملیشین وزیراعظم کا کہنا تھا کہ یہ قتل جمال خاشوگی کے قتل کے مترادف ہے جو دوسرے ملک میں ہوا ، اب یہ ایک اور واقعہ جہاں ایک ملک دوسرے ملک کے رہنماؤں کو قتل کرنے کا فیصلہ خود کرتا ہے۔ دونوں قتل غیر اخلاقی اور قانون کے خلاف ہے۔
انھوں نے خبردار کیا یہ امریکی حملہ دہشت گردی کو بڑھاوا دے گا، ایک سوال کہ کیا وہ عالمی سطح پر اپنے خیالات کو جاری رکھیں گے تو ڈاکٹر مہاتیر نے کہا کہ وہ "سچائی کی نشاندہی کرتے رہیں گے”۔
مہاتیر محمد کا مزید کہنا تھا کہ مجھے اس بات کی فکر نہیں ہے کہ کون مضبوط ہے اور کون کمزور ہے، اگر معاملات ٹھیک نہیں ہیں تو مجھے لگتا ہے کہ مجھے آواز اٹھانے کا حق ہے۔
واضح رہے بغداد ائیرپورٹ پر امریکی فضائی حملہ میں ایران کی القدس فورس کے جنرل قاسم سلیمانی کو ہلاک ہوگئے تھے،جس کے بعد ایرانی حکومت نے امریکی حملے کی مذمت کرتے ہوئے بدلہ لینے کا اعلان کیا تھا۔
بعد ازاں امریکی صدر ڈونلڈ ٹرمپ نے یہ کہا تھا کہ ایران کے 52 اہم مقامات امریکی نشانے پر ہیں۔
