اسلام آباد: وفاقی وزیر برائے مواصلات مراد سعید کا کہنا ہے کہ سابقہ حکومتیں ملک کو تباہی کے دہانے پر پر چھوڑ کر گئیں۔
تفصیلات کے مطابق وفاقی دارالحکومت اسلام آباد میں تقریب سے خطاب کرتے ہوئے وفاقی وزیر مراد سعید کا کہنا تھا کہ تحریک انصاف گرین پاکستان کے لیے اقدامات کر رہی ہے، گرین اینڈ کلین پاکستان وزیراعظم کا وژن ہے۔
وفاقی وزیر نے کہا کہ جو پاکستان یہ چھوڑ کر گئے تھے ہم نے وہی سے آغاز کیا ہے، اداروں کو خسارے سے نکال کر اپنے پیروں پر کھڑا کرنا ہے، سابقہ حکومتیں ملک کو تباہی کے دہانے پر پر چھوڑ کر گئیں۔
مراد سعید کا کہنا تھا کہ ہنرمند پاکستان پروگرام کا مطلب اپنے نوجوانوں کو ہنرمند بنانا ہے، سی پیک کے تحت مغربی روٹ پرعمل شروع کردیا ہے، 16 ماہ میں این ایچ اے کے ریونیو میں 25 ارب روپے سے زائد اضافہ ہوا۔
وفاقی وزیر کے مطابق ملکی معیشت کا استحکام موجودہ حکومت کی اولین ترجیح ہے، حکومت کا احساس پروگرام فلاحی ریاست کی جانب ایک قدم ہے، ملک بھر میں 200 کے قریب پناہ گاہیں بن چکی ہیں۔
معیشت بہتر ہورہی ہے، جلد ثمرات عوام تک پہنچیں گے: مراد سعید
یاد رہے کہ گزشتہ ماہ وفاقی وزیرمواصلات مراد سعید کا کہنا تھا کہ آج قومی ادارے اپنے پاؤں پر کھڑے ہورہے ہیں، معیشت بہتری کی جانب گامزن ہوچکی ہے، جلد ثمرات عوام تک پہنچیں گے۔
