کراچی: شہر قائد کے علاقے اورنگی ٹاؤن سے نومولود بچوں کو اغوا کرنے والے گینگ کی گرفتاری کے بعد پولیس نے مختلف مقامات پر اہم چھاپے مارے ہیں۔
تفصیلات کے مطابق گزشتہ رات پولیس نے اورنگی ٹاؤن میں سرکاری اسپتال قطر کے قریب چھاپا مار کر نومولود بچوں کو اغوا کرنے والے گینگ کے اہم ارکان کو پکڑ لیا تھا، آج گرفتار ملزم اور ملزمہ کی نشان دہی پر مختلف مقامات پر پولیس نے چھاپے مارے۔
اے آر وائی نیوز کے مطابق گرفتار ملزمان میں عدنان شوکت ولد شوکت شاہ، اور فوزیہ عرف دعا ولد خورشید احمد شامل ہیں، پولیس نے امکان ظاہر کیا ہے کہ نومولود بچوں کے اغوا میں اسپتال انتظامیہ بھی شامل ہے، پولیس ذرایع کا کہنا ہے کہ ملزمان ممکنہ طور پر اسپتال انتظامیہ کی ملی بھگت سے وارداتیں کرتے تھے، اس گروہ میں دیگر خواتین اور مرد بھی شامل ہیں۔
پولیس کی بڑی کامیابی، نومولود بچوں کو اغوا کرنے والا گینگ پکڑا گیا
پولیس کے مطابق ملزمان سرکاری اسپتال سے ایک عرصے سے نومولود بچے اغوا کر رہے ہیں، گزشتہ رات کارروائی کے دوران خاتون سمیت 2 ملزمان کو گرفتار کیا گیا تھا، ملزمان نومولود بچے اغوا کرنے کی کوشش کر رہے تھے۔
ایس ایس پی ویسٹ فدا حسین کا کہنا تھا ملزمان پر چھاپا اس وقت مارا گیا تھا جب وہ قطر اسپتال اورنگی ٹاؤن سے نومولود بچے کو اغوا کرنے کی کوشش کر رہے تھے۔ دیگر ملزمان کی تلاش میں مزید چھاپے مارے جائیں گے۔
