واشنگٹن: امریکی صدر ڈونلڈ ٹرمپ کی صاحبزادی ایوانکا ٹرمپ نے ورلڈ بینک کی رپورٹ کو خوش آئند قرار دیتے ہوئے سعودی عرب اور متحدہ عرب امارات سمیت دیگر خیلجی ممالک کی تعریف کی۔
تفصیلات کے مطابق گزشتہ روز ورلڈ بینک کی جانب سے ’’ویمن بزنس اینڈ دی لاء 2020 رپورٹ’’ شایع کی گئی تھی جس میں 190 ممالک کا جائزہ لینے کے بعد اس امر کی تصدیق کی گئی کہ اصلاحات پر عمل درآمد اور مجموعی بہتری لانے کے حوالے سے سعودی عرب سرفہرست ہے۔ جبکہ دیگر عرب اور خلیجی ممالک نے اچھے نمبر حاصل کیے۔
عالمی بینک کی رپورٹ میں کہا گیا کہ سعودی عرب نے کل (100) میں سے 70.6 نمبر حاصل کیے، اصلاحات کے حوالے سے سعودی عرب خلیجی ممالک میں پہلے جب کہ عرب دنیا میں دوسرے نمبر پر ہے۔
Great seeing some big progress in countries w/ the most-improved scores in this yrs @WorldBank WBL Report: Saudi Arabia, UAE, Nepal, South Sudan, Sao Tome and Principe, Bahrain, DRC, Djibouti, Jordan, and Tunisia. See the reforms made & those that remain⬇️https://t.co/TaK9B3e57g
— Ivanka Trump (@IvankaTrump) January 16, 2020
اس حیران کن رپورٹ پر امریکی صدر ڈونلڈ ٹرمپ کی صاحبزادی پیچھے نہ رہیں اور سماجی رابطے کی ویب سائٹ ٹوئٹر پر ٹوئٹ کرکے اسے اہم کامیابی قرار دیا۔ ان کا کہنا تھا کہ اس رپورٹ سے یہ بات واضح ہوتی ہے کہ عرب دنیا میں خواتین کو مواقع اور ملازمت کی سہولیات فراہم کی جارہی ہیں۔
خیال رہے کہ یہ بڑی کامیابی خواتین سے متعلق نظام میں قانونی اصلاحات کا نتیجہ ہے، ان اصلاحات کا مقصد مملکت کی معیشت میں خواتین کے کردار کو مضبوط بنانا اور علاقائی و عالمی سطح پر مملکت کی مسابقت کو بلند کرنا ہے۔ رپورٹ میں واضح کیا گیا کہ مملکت کے ویژن 2030 پروگرام نے مذکورہ اصلاحات پر عمل درآمد میں اپنا کردار ادا کیا۔
