اسلام آباد: وزیر اعظم عمران خان سے انسپکٹر جنرل (آئی جی) سندھ ڈاکٹر کلیم امام کی ملاقات ہوئی، آئی جی سندھ کو کل وزیر اعظم نے طلب کیا تھا۔
تفصیلات کے مطابق وزیر اعظم عمران خان سے انسپکٹر جنرل (آئی جی) سندھ ڈاکٹر کلیم امام کی ملاقات ہوئی، آئی جی سندھ نے وزیر اعظم کو صوبے میں امن و امان کی صورتحال سے آگاہ کیا۔
وزیر اعظم عمران خان نے آئی جی کی ممکنہ تبدیلی کی وجوہات پر بھی بات چیت کی۔
وزیر اعظم عمران خان سے آئی جی سندھ سید کلیم امام کی ملاقات pic.twitter.com/JFsceAmCUO
— PTI (@PTIofficial) January 29, 2020
خیال رہے کہ آئی جی سندھ وزیر اعظم عمران خان کی طلبی پر اسلام آباد پہنچے تھے۔ گزشتہ روز ایک تقریب سے خطاب کرتے ہوئے آئی جی سندھ نے اپنے تبادلے کی خبر کی تردید کردی تھی۔
آئی جی کا کہنا تھا کہ ہم تمام پولیس افسران قانون کے تحت کام کرتے ہیں، قانون نافذ کرنے کی کوشش کرتے ہیں تو راہ میں رکاوٹیں بھی پیش آتی ہیں۔
کلیم امام نے کہا تھا کہ میرا تبادلہ اتنی آسانی سے ہونے والا نہیں ہے، جاؤں گا تو اپنے مقدر سے جاؤں گا اور کسی بڑی جگہ یا نئے مراحل پر جاؤں گا۔ میرے خلاف شدید قسم کی سازش ہوئی ہے۔
اس سے قبل وزیر اعظم عمران خان کی زیر صدارت ہونے والے وفاقی کابینہ کے اجلاس میں نئے آئی جی سندھ کا معاملہ بھی زیر غور آیا تھا۔ سندھ حکومت کی جانب سے آئی جی سندھ کے لیے دیے گئے ناموں پر اعتراض کیا گیا تھا۔
