لاہور: پنجاب کے شہر لاہور میں نئے تعلیمی سال سے قبل 100 انصاف اسکول بنانے کا فیصلہ کر لیا گیا ہے۔
تفصیلات کے مطابق ایجوکیشن اتھارٹی نے لاہور شہر میں سو انصاف اسکول بنانے کا فیصلہ کیا ہے، اس سلسلے میں فنڈ کے اجرا کے لیے باقاعدہ نوٹیفکیشن جاری کر دیا گیا۔
نوٹیفکیشن میں کہا گیا ہے کہ 100 انصاف اسکول کرائے کی عمارتوں میں بنائے جائیں گے۔ ایجوکیشن اتھارٹی نے کرائے کی عمارتوں کے لیے 20 کروڑ 91 لاکھ روپے جاری کر دیے ہیں، یہ رقم 5 تحصیلوں کے ڈپٹی ڈی اوز کے اکاؤنٹ میں منتقل کی گئی ہے۔
ایجوکیشن اتھارٹی کے مراسلے میں کہا گیا ہے کہ کرائے کی عمارت لینے سے پہلے ایکسائز ڈیپارٹمنٹ اس کا معائنہ کرے گا، ہیلتھ ڈیپارٹمنٹ سے مذکورہ عمارت کا فٹنس سرٹیفکیٹ لینا لازمی ہوگا۔ مراسلے کے مطابق انصاف اسکولوں کے لیے نئی بھرتیاں بھی نہیں کی جائیں گی بلکہ دستیاب اساتذہ کو ان میں تعینات کیا جائے گا۔
دریں اثنا، ڈی پی آئی پنجاب نے ڈسٹرکٹ ایجوکیشن اتھارٹیز سے اساتذہ کا سروس ریکارڈ طلب کر لیا ہے، صوبہ بھر کے ہزاروں اساتذہ کی ان سروس پرموشن التوا کا شکار ہونے کی وجہ سے اسکول ایجوکیشن ڈیپارٹمنٹ پنجاب نے اتھارٹیز کو فائنل وارننگ جاری کر دی ہے، وارننگ میں کہا گیا ہے کہ 19 فروری تک ان سروس پرموشنز کا مکمل ریکارڈ فراہم کیا جائے۔
