دمشق: شام میں ایک اور اجتماعی قبر سے 70 کے قریب افراد کی باقیات برآمد ہوئی ہیں۔
غیرملکی خبررساں ادارے کی رپورٹ کے مطابق شامی دارالحکومت دمشق سے یہ اجتماعی قبر دریافت ہوئی جہاں عام شہریوں سمیت سیکیورٹی فورسز کے اہلکاروں کو مار کر دفن کیا گیا تھا۔
رپورٹ میں کہا گیا ہے کہ دمشق میں شدت پسندوں کی ماضی کی آماج گاہ تصور کیے جانے والے گوٹا نامی علاقے سے مذکوہ اجتماعی قبر دریافت ہوئی۔ امکان ظاہر کیا جارہا ہے کہ یہ قبر 2012 سے 2014 کے درمیان بنائی گئی ہوگی۔ خیال رہے کہ گاٹا میں اس دوران باغیوں اور اتحادی افواج کے درمیان خوں ریز جنگ جاری تھی۔
ملکی فورسز نے اتحادی افواج کے ساتھ مل کر مذکوہ علاقہ 2018 میں فتح کیا۔ محتاط اندازے کے مطابق دمشق کے اس علاقے میں ہونے والی جنگ کے نتیجے میں تقریباً ایک ہزار عام شہری مارے گئے جن میں بچے اور خواتین بھی شامل ہیں۔
برونڈی میں اجتماعی قبروں سے 6 ہزار سے زائد لاشیں برآمد
خیال رہے کہ آج ہی کے روز مشرقی افریقی ملک برونڈی کے صوبے قصوری میں اجتماعی قبر سے 6 ہزار سے زائد لاشیں برآمد ہوئیں ہیں، ان افراد کو خانہ جنگی کے دوران قتل کرکے اجتماعی قبر میں دفنا دیا گیا تھا۔
یہ لاشیں چھ اجتماعی قبور سے برآمد ہوئی ہیں جبکہ ان قبروں سے ہزاروں کی تعداد میں گولیاں بھی ملی ہیں۔
