اسلام آباد: وفاقی وزیر برائے موصلات مراد سعید نے نوجوانوں کو خوشخبری سناتے ہوئے کہا کہ نوجوانوں کو مختلف شعبوں میں فنی تربیت دی جائے گی۔
تفصیلات کے مطابق وفاقی وزیر برائے موصلات مراد سعید نے تقریب سے خطاب کرتے ہوئے کہا کہ نیشنل ہائی وے اتھارٹی (این ایچ اے) نوجوانوں کے لیے انٹرن شپ پروگرام شروع کر رہا ہے، نوجوانوں کو مختلف شعبوں میں فنی تربیت دی جائے گی۔
مراد سعید کا کہنا تھا کہ نوجوان ملک کا مستقبل ہیں، ہمارے ملک کے نوجوانوں کو بے روزگاری کا سامنا ہے۔ وزیر اعظم کے وژن کو لے کر اپنے اداروں میں نوکریاں پیدا کریں گے۔
انہوں نے کہا کہ جب ملک سنبھالا تو تمام ادارے خسارے میں تھے۔ پوسٹ آفس کا ایک پروجیکٹ مارچ کے پہلے ہفتے سے شروع کر رہے ہیں، ملک میں 1 لاکھ 25 ہزار مزید پوسٹ آفسز کھل جائیں گے۔
مراد سعید کا کہنا تھا کہ پاکستان کے اندر ای کامرس کی ضرورت ہے، این ایچ اے میں 16 ماہ کے اندر 27 بلین روپے کا اضافہ ہوا۔ این ایچ اے میں 10 ارب 90 کروڑ روپے کی ریکوری کی گئی۔ محکمہ این ایچ اے خود اپنا پیسہ سڑکوں پر لگائے گا۔
انہوں نے مزید کہا کہ حیدر آباد سکھر موٹر وے پر کام رواں سال شروع ہوگا، ہم نے اپنی سیاحت کو فروغ دینا ہے۔
