اسلام آباد: وفاقی وزیر منصوبہ بندی اسد عمر کا کہنا ہے کہ سی پیک منصوبوں پر عمل درآمد کی رفتار کو مزید تیز کیا جائےگا۔
تفصیلات کے مطابق وفاقی وزیر منصوبہ بندی اسد عمر سے چینی سفیر یاؤجنگ نے ملاقات کی۔ ملاقات میں وفاقی وزیر نے سی پیک منصوبوں کی مجموعی صورت حال پر اطمینان کا اظہار کیا۔
اسد عمر کا کہنا تھا کہ منصوبوں پر عمل درآمد کی رفتار کو مزید تیز تر کیا جائے گا، صوبوں میں اسپیشل اکنامک زونز کے قیام اور عمل کو ترجیح دی جا رہی ہے،اکنامک زونزمیں ہونے والی پیشرفت پر کڑی نگرانی بھی کی جا رہی ہے۔
وفاقی وزیر کا کہنا تھا کہ صوبائی اور وفاقی حکومتیں کے سی آر منصوبے میں دلچسپی رکھتے ہیں۔ اس موقع پر چینی سفیر یاؤ جنگ کا کہنا تھا کہ صنعتوں کے مابین ہر طرح کے تعلقات کو فروغ دینے کے خواہاں ہیں۔
سی پیک کے تحت جاری منصوبوں کو جلد مکمل کیا جائے،وزیراعظم
وزیراعظم عمران خان کا کہنا تھا کہ سی پیک کے تحت جاری منصوبوں کو جلد مکمل کیا جائے، مستقبل کے منصوبوں سے متعلق مشاورتی عمل کو تیز کریں۔
وزیراعظم پاکستان کا کہنا تھا کہ چین نے مشکل حالات میں پاکستان کی مدد کی ہے، سی پیک منصوبہ پاک چین مضبوط تعلقات کا مظہر ہے، منصوبے سے غربت کے خاتمے میں مدد ملے گی، زراعت میں چین کے تجربے سے استفادہ کرنے کی ضرورت ہے۔
