مکہ المکرمہ : سعودی حکومت نے انسانیت کی خدمت کی اعلیٰ مثال قائم کرتے ہوئے فٹ پاتھ پر زندگی گزارنے والے بے سہارا اور ضعیف شخص کو چھت فراہم کردی۔
تفصیلات کے مطابق مکہ کے ایک نجی ہسپتال کے باہر ایک بزرگ شہری جھونپڑی ڈال کر گزشتہ کافی عرصے سے رہ رہا تھا، جس کی ویڈیو کسی شخص نے سوشل میڈیا پر پوسٹ کردی۔
ویڈیو وائرل ہونے کے بعد وزارت محنت و سماجی بہبود آبادی نے صورتحال کا نوٹس لیا اور فوری طور پر معلومات حاصل کرنے کے لیے بہبود آبادی ٹیم کو وہاں پہنچنے کی ہدایت کی۔
تحقیقاتی ٹیم نے مکہ کے علاقے العزیزیہ کے نجی اسپتال کے باہر ڈیرہ ڈالے ہوئے معمر شخص سے متعلق رپورٹ دی کہ اس کا کوئی والی وارث نہیں ہے تنہا سڑک پر ہی زندگی کے شب و روز گزارنے پر مجبور ہے،۔
رپورٹ میں سفارش کی گئی کہ معمر شخص کیلیے طعام و قیام کا انتظام کیا جائے وزارت محنت نے تحقیقاتی ٹیم کی سفارش پر عمل کرتے ہوئے فلاحی تنظیم کے تعاون سے معمر شخص کے لیے مکہ کے ہوٹل میں عارضی قیام کا بندوبست کرادیا۔
اس حوالے سے وزارت محنت کے ذرائع نے بتایا کہ ضعیف اور بے سہارا شخص کی ہر ممکن امداد کی جا رہی ہے، مقامی اسپتال میں ان کا تفصیلی طبی معائنہ بھی کیا گیا بعد ازاں انہیں اولڈ ہوم منتقل کردیا جائے گا۔
واضح رہے کہ اس سے قبل بھی ایک معمر اور بے گھر شخص جو ساحل کے قریب پارک میں مقیم تھا کو وزارت محنت نے گھر فراہم کیا تھا۔
