ریاض: سعودی عرب نے امریکی، برطانوی، یا شین جن ویزا رکھنے والے پاکستانی شہریوں کے لیے ایک سالہ ملٹی پل انٹری ویزہ متعارف کرا دیا۔
تفصیلات کے مطابق سعودی حکومت نے پاکستان اور دیگر ملکوں کے ایسے شہریوں کے لیے 1 سالہ ملٹی پل انری وزٹ ویزہ متعارف کروایا ہے جن کے پاسپورٹ پر امریکی، برطانوی، یا شین جن ویزا لگا ہوا ہو۔
پاکستانی ایک سال کی مدت کے دوران اس ویزے کو عمرے کی ادائیگی کے لیے استعمال کر سکیں گے لیکن یہ ویزا حج کی ادائیگی کے لیے استعمال نہیں ہوسکے گا۔ ویزا آن آرائیول حاصل کرنے کے لیے اپنے ساتھ کریڈٹ کارڈ رکھنا ہوگا تاکہ 18 ہزار روپے کے برابر ویزا فیس ادا کی جاسکے جبکہ نقد رقم قابل قبول نہیں ہوگی۔
ویزا آن آرائیول حاصل کرنے والا شخص ایک وقت میں زیادہ سے زیادہ 90 دن تک سعودی عرب میں قیام کرسکے گا تاہم وہ ایک سے زائد بار سعودی عرب میں داخل ہو سکے گا۔
ویزٹ ویزا پر سعودی عرب آنے والوں کے لیے نئی سہولت متعارف
اس سے قبل گزشتہ ماہ سعودی عرب میں ویزٹ ویزا پر آنے والے غیرملکیوں کے لیے نئی سہولت متعارف کی گئی تھی جس کے تحت انہیں چالان کی ادائیگی میں آسانی ہوگی۔
یاد رہے کہ گزشتہ سال ستمبر میں سعودی عرب نے اعلان کیا تھا کہ وہ پہلی بار آن لائن سیاحتی ویزے کا آغاز کر رہا ہے۔
