نئی دہلی: امریکی صدر ڈونلڈ ٹرمپ نے بھارتی سر زمین پر مسئلہ کشمیر سے متعلق ثالثی کی پیشکش کر دی۔
تفصیلات کے مطابق دورہ بھارت کے دوران امریکی صدر ڈونلڈ ٹرمپ نے پریس کانفرنس کے دوران ایک مرتبہ پھر پاک بھارت ثالثی کی پیشکش کر دی۔
بھارتی صحافی نے امریکی صدر کو پاکستان مخالف گفتگو پرا کسانے کی کوشش کی۔ امریکی صدر ڈونلڈٹرمپ نے پاکستان کی تعریف کر کے صحافی کو لاجواب کر دیا۔ ڈونلڈ ٹرمپ نے وزیراعظم پاکستان عمران خان کو اچھا انسان قرار دیتے ہوئے کہا کہ میرے ان سے اچھے تعلقات ہیں۔
افغانستان سے متعلق امریکی صدر کا کہنا تھا کہ پاکستان سمیت ہرکوئی افغانستان میں امن کاخواہاں ہے، 19سال بعد فوج کو واپس اپنے وطن میں دیکھناچاہتے ہیں، طاقت میں ہونے کے باوجود لوگوں کو مروانے کے حق میں نہیں۔
روس سے متعلق سوال پر ڈونلڈ ٹرمپ کا کہنا تھا کہ آئندہ امریکی انتخابات میں روس کی مداخلت کا مجھےعلم نہیں ہے۔ انہوں نے مزید کہا کہ شدت پسندی اور داعش کے خلاف جو میں نے کیا ماضی میں نہیں ہوا۔
اس سے قبل گزشتہ ماہ ڈیووس میں امریکی صدر ڈونلڈ ٹرمپ نے مسئلہ کشمیر پر ایک بار پھر ثالثی کی پیشکش کرتے ہوئے کہا تھا کہ پاکستان اور بھارت کے درمیان ثالثی کے لیے کردار ادا کر سکتا ہوں۔
