اسلام آباد: وزارت فوڈ سیکیورٹی اینڈ ریسرچ نے پیاز کی ایکسپورٹ پر پابندی عائد کر دی۔ پیاز کی برآمدات 31 مئی تک بند رہے گی۔
اقتصادی رابطہ کمیٹی نے پیاز کی ایکسپورٹ پر پابندی کا فیصلہ کیا تھا جس کے بعد وفاقی وزارت فوڈ سیکیورٹی اینڈ ریسرچ نے پابندی کا نوٹیفیکیشن جاری کردیا۔
نوٹفکیشن کے اجراء سے قبل بندرگاہ پر پہنچنے والی لاکھوں ڈالر کی پیاز کی ایکسپورٹ خطرے میں پڑ گئی ہے۔
پاکستان فروٹ اینڈ ویجییٹبل ایکسپورٹرز ایسوسی ایشن نے وفاقی وزارت تجارت سے مطالبہ کیا ہے کہ پورٹ پر موجود پیاز کی ایکسپورٹ کی اجازت دی جائے۔
ایسوسی ایشن کے مطابق پیاز کے 170 کنٹینرز بندرگاہ پر موجود ہیں یہ کنٹینرز پیر کو روانہ ہونے والے جہاز پر لادے جانے تھے اگر پورٹ پر موجود پیاز کے کنٹینرز ایکسپورٹ نہ ہوئے تو 20 لاکھ ڈالر کا نقصان ہوگا۔
