مانچسٹر : برطانوی شہریوں نے بھی حکومتی احکامات ہوا میں اڑا دئیے، شہریوں نے جنگل میں جاکر بار بی کیو پارٹیاں شروع کردیں۔
اے آر وائی نیوز کی رپورٹ کے مطابق برطانیہ میں کرونا وائرس کی وبا کو مزید پھیلنے سے روکنے کےلیے حکومت کی جانب سے ملک بھر میں لاک ڈاؤن کیا گیا ہوا ہے لیکن حکومتی احکامات کے باوجود لوگوں نے اپنا رویہ تبدیل نہیں کیا۔
برطانوی شہریوں نے جنگل میں جاکر بار بی کیو پارٹیاں شروع کردی ہیں، گریٹر مانچسٹر فائر سروس عوام کے اس رویے سے انتہائی ناخوش ہے، فائر سروس کا کہنا ہے کہ ان حالات میں جب وسائل کی کمی ہے تو ایسا رویہ قابل افسوس ہے۔
فائر سروس کے مطابق مانچسٹر کے ان جنگلات میں پہلے کئی بار آگ لگ چکی ہے، موسم اچھا دیکھ کر درجنوں افراد نے جنگلوں کا رخ کرلیا ہے تاکہ بار بی کیو پارٹی کرسکیں۔
نمائندہ اے آر وائی کے مطابق پولیس نے موقع پر پہنچ کر لوگوں کو جنگلات سے بھگایا اور عوام کو گھروں میں رہنے کی سخت ہدایات جاری کی گئیں۔
ایمرجنسی سروس کا کہنا ہے کہ گھر سے کام کرنے کی سہولت کا مطلب وائرس کے پھیلاؤ کو روکنا ہے باہر جاکر پکنک منانا نہیں، اس مشکل وقت میں عوام حکومت اور اداروں کے ساتھ تعاون کریں۔
خیال رہے کہ کرونا وائرس کے باعث برطانیہ میں اب تک 465 افراد ہلاک ہوچکے ہیں جبکہ 9 ہزار 529 افراد مریض ہیں۔
