اسلام آباد: اقوام متحدہ نے کورونا پررکن ممالک کے سائنس وزرا کا اجلاس طلب کرلیا، وفاقی وزیر سائنس اینڈ ٹیکنالوجی فواد چوہدری پاکستان کی نمائندگی کریں گے۔
تفصیلات کے مطابق کورونا وائرس کے خطرات سے نمٹنے کےلیےعالمی سطح پرکوششیں تیز کردیں، اقوام متحدہ نے کورونا پررکن ممالک کے سائنس وزرا کا اجلاس طلب کرلیا۔
اجلاس 30 مارچ ویڈیو لنک کے ذریعے ہوگا ، وفاقی وزیر سائنس اینڈ ٹیکنالوجی فواد چوہدری پاکستان کی نمائندگی کریں گے، اجلاس میں سائنس کی مدد سےکورونا سے بچاؤ پر تجاویز دی جائیں گی۔
رکن ممالک کے سائنس وزرا کے اجلاس میں کووڈ19 کےخلاف عالمی جنگ میں لائحہ عمل تیار کیا جائے۔
واضح رہے نئے اور مہلک وائرس COVID 19 دنیا کے 199 ممالک تک پھیل گیا ہے، ہلاکتیں بڑھ کر 24 ہزار 89 ہوگئیں، جب کہ 5 لاکھ 32 ہزار 237 افراد وائرس سے متاثر ہو چکے ہیں، دوسری طرف صحت یاب افراد کی تعداد بھی بڑھ کر ایک لاکھ 24 ہزار 331 ہو گئی ہے۔
وائرس کی ہلاکت خیزی کے آگے بھی تاحال کوئی قابل ذکر بندھ نہیں باندھا جا سکا، تاہم دنیا بھر میں سائنس دان وائرس کا توڑ نکالنے کے لیے سرتوڑ کوششیں کر رہے ہیں۔
یہ وائرس چین کے شہر ووہان سے پھیلنا شروع ہوا، چین کے اندر وائرس کے پھیلاؤ اور ہلاکت خیزی کو تقریباً کنٹرول کیا جاچکا ہے، تاہم دنیا کے دیگر ممالک میں وائرس چین سے بھی کہیں زیادہ تباہ کن ثابت ہوا۔
