کراچی : ڈائریکٹر جنرل پرائیویٹ اسکول ڈاکٹرمنسوب صدیقی نے سندھ کے تمام اسکولوں کو ہدایت دی ہے کہ صرف ماہانہ فیس وصول کریں اور دو ماہ یکمشت یا سہہ ماہی فیس وصول نہیں کی جائے گی۔
تفصیلات کے مطابق ڈائریکٹر جنرل پرائیویٹ اسکول ڈاکٹرمنسوب صدیقی نے سندھ کے تمام اسکولوں احکامات جاری کردئے ہیں ، جس میں کہا گیا ہے کہ تمام نجی اسکول اساتذہ اور ملازمین کی تنخواہیں بر وقت ادا کریں اور وبائی صورتحال میں کسی بھی اسٹاف ممبر کو نوکری سے نہیں نکالا جائے.
ڈائریکٹر جنرل پرائیویٹ نے کہا ہے کہ اسکول کراچی سمیت صوبے بھرمیں کوئی بھی پرائیویٹ اسکول طلباء کے والدین پر اضافی فیسوں کا بوجھ نہیں ڈالے گا، تمام نجی اسکول صرف ماہانہ فیس وصول کر یں گے اور دو ماہ یکمشت یا سہہ ماہی فیس وصول نہیں کی جائے گی۔
ڈاکٹرمنسوب صدیقی کا کہنا تھا کہ محکمہ تعلیم کی اسٹریننگ کمیٹی کے فیصلے پر عمل کیا جائے، کسی بھی اسکول نے وبائی صورتحال میں اسٹاف کو نکالا یا پھر دوسے تین ماہ کی فیس ایک ساتھ وصول کی تو اسکے خلاف کاروائی ہوگی اور رجسٹریشن منسوخ کردی دی جائے گی۔
یاد رہے سندھ حکومت نے کرونا وائرس کے پیش نظر تعلیمی اداروں کی تعطیلات کو 30 مئی تک بڑھانے کا اعلان کیا تھا ،صوبائی وزیر تعلیم سعید غنی کا کہنا تھا کہ سندھ حکومت نے کرونا کی وجہ سے گرمیوں کی تعطیلات قبل از وقت دے دیں جبکہ نویں اور دسویں جماعت کے 16 مارچ سے شروع ہونے والے امتحانات ملتوی کردیئے گئے۔
وزیر اعلیٰ سندھ نےتمام اضلاع کی انتظامیہ کو اقدامات کی ہدایت کی تھی ، ذرائع محکمہ تعلیم کا کہنا تھا کہ کوچنگ سینٹرز کھولنے والوں کے خلاف کارروائی ہوگی، محکمہ تعلیم کےاحکامات پر عمل کرناہوگا۔
