اسلام آباد:وزارت اوورسیز نے ایمپلائز اولڈ ایج بینیفٹس انسٹی ٹیوشن (ای او بی آئی) پنشنرز کے لیے بڑا اعلان کردیا۔
وزارت اوورسیز کے مطابق ای او بی آئی آج سے پنشنرز کو 8500 روپے ماہانہ ادا کرے گا، پنشنرز کو بقایا جات کی مد میں 4 ہزار روپے بھی ادا کیے جائیں گے۔
وزارت اوورسیز کے مطابق پنشنرز کو جنوری سے اب تک 12 ہزار 500 روپے منتقل ہوں گے، رقم بقایا جات کی مد میں پنشنرز کے اکاؤنٹ میں منتقل ہوں گی۔
وزارت اوورسیز کا کہنا ہے کہ معاون خصوصی زلفی بخاری نے یکم جنوری سے پنشن بڑھانے کا اعلان کیا تھا۔
دوسری جانب زلفی بخاری کا کہنا ہے کہ ای او بی آئی ملک کے لیے کام کرنے والوں کے بڑھاپے کا ذمہ دار ہے، ای او بی آئی پنشن کو 15 ہزار تک لے کر جائیں گے۔
مزید پڑھیں: پنشنرز کے لیے بڑی خوش خبری، اب گھر بیٹھے بڑی سہولت ملے گی
معاون خصوصی زلفی بخاری نے کہا کہ ماضی میں ای او بی آئی میں جتنی کرپشن ہوئی شاید ہی کسی ادارے میں ہوئی ہو۔
انہوں نے کہا کہ ای او بی آئی میں 21 ارب کی وصولیاں کی گئیں، ادارے کی بہتری کے لیے منیجنگ ڈائریکٹر، عملے کی کوششیں قابل تعریف ہیں۔
واضح رہے کہ دو ماہ قبل ای او بی آئی کی جانب سے صارفین کا ڈیٹا آن لائن کردیا گیا تھا جس کے بعد تمام پنشنرز محکمے کی ویب سائٹ پر جاکر اپنی پنشن کی رقم کے حوالے سے گھر بیٹھے معلومات حاصل کرسکتے ہیں۔
