واشنگٹن: امریکی صدر ڈونلڈ ٹرمپ نے کرونا وائرس کے بڑھتے کیسز کے سبب ہر طرح کی امیگریشن پر عارضی پابندی عائد کرنے کا اعلان کردیا۔
تفصیلات کے مطابق امریکی صدر ڈونلڈ ٹرمپ نے سماجی رابطے کی ویب سائٹ ٹویٹر پر اپنے پیغام میں کہا کہ کرونا وائرس کے باعث امریکی شہریوں کے روزگار کو بچانے کے لیے میں امریکا میں امیگریشن پر عارضی پابندی عائد کرنے کے حکم نامے پر دستخط کرنے لگا ہوں۔
امریکی صدر نے لکھا کہ وہ امریکی معیشت کو پہنچنے والے نقصان کے باعث یہ پابندی لگارہے ہیں، واضح رہے کہ امریکی حکومت کی جانب سے گزشتہ ماہ سے ہی ہر قسم کے ویزہ سے متعلق کارروائی معطل کی جاچکی ہے۔
In light of the attack from the Invisible Enemy, as well as the need to protect the jobs of our GREAT American Citizens, I will be signing an Executive Order to temporarily suspend immigration into the United States!
— Donald J. Trump (@realDonaldTrump) April 21, 2020
امریکی اخبار نیویارک ٹائمز کے مطابق ٹرمپ کے نئے حکم نامے کے باعث امریکا میں موجود غیرملکیوں کو ورک ویزہ میں اضافے اور گرین کارڈ کے منتظر افراد کو مشکلات کا سامنا ہوسکتا ہے۔
یاد رہے کہ امریکا میں کرونا وائرس سے ہلاکتوں کی تعداد 42 ہزار 518 ہوگئی ہے، 7 لاکھ 93 ہزار افراد متاثر ہیں جبکہ کرونا وائرس کے سبب 42 ہزار سے زائد افراد ہلاک ہوچکے ہیں۔
دنیا بھر میں کرونا وائرس کے مریضوں کی تعداد 25 لاکھ 27 ہزار 770 ہوگئی، کرونا وائرس کے باعث اموات ایک لاکھ 74 ہزار 455 ہوگئیں، کرونا کے صحت یاب مریضوں کی تعداد 6 لاکھ 64 ہزار 220 ہوگئی ہے۔
