لندن : برطانوی وزیرخارجہ ڈومینک راب کا کہنا ہے کہ کرونا ویکسین کامیاب ہوگئی تو تمام ممالک کے لیے دستیاب ہوگی۔
تفصیلات کے مطابق برطانوی وزیرخارجہ ڈومینک راب نے کہا کہ برطانیہ کرونا ویکسین کے لیے سب سے زیادہ رقم خرچ کر رہا ہے، کرونا ویکسین کامیاب ہوگئی تو تمام ممالک کے لیے دستیاب ہوگی۔
ڈومینک راب کا کہنا تھا کہ برطانیہ نے ویکسین کے لیے 744ملین پاؤنڈز مختص کر رکھے ہیں،مختص رقم میں سے 250 ملین پاؤنڈز دنیا بھر میں ویکسین ریسرچ کے لیے مختص کیے گئے ہیں۔انہوں نے بتایا کہ برطانیہ اس وقت ویکسین ریسرچ کی دوڑ میں سب سے آگے ہے۔
برطانوی وزیر خارجہ نے کہا کہ کرونا وائرس کی مزید لہر کو روکنے کے لیے ہر طرح کی مدد کریں گے،کرونا تمام ممالک کا مسئلہ ہے،سب کے ساتھ مل کر مقابلہ کریں گے۔
کرونا ویکسین ٹرائل : برطانیہ کی مزید رضا کاروں کی بھرتی کے لیے عوام سے اپیل
یاد رہے کہ دو روز قبل برطانیہ نے کرونا ویکسین ٹرائل کی مہم کو مزید مؤثر بنانے کی غرض سے مزید رضا کاروں کے لیے عوام سے اپیل کی تھی مزید رضا کاروں کے لیے اپیل امپیریل کالج لندن کی جانب سے کی گئی تھی۔
